Reduce a brecha co resto das comunidades e sitúase en 2.258,4 euros
SANTIAGO DE COMPOSTELA, 18 Dic. (EUROPA PRESS) -
O custo laboral medio das empresas por traballador e mes (que inclúe as remuneracións e as cotizacións sociais) subiu a 2.258,4 euros en Galicia no terceiro trimestre, un 2% máis que o mesmo período de 2016.
Segundo os datos publicados este luns polo Instituto Nacional de Estatística (INE), esta alza está por encima do avance do conxunto das comunidades do 0,4%, pero sitúase case 200 euros por baixo dos 2.454,3 euros da media. Con todo, redúcese a brecha, pois no segundo trimestre había 272 euros de diferenza.
Na clasificación por autonomías Galicia ocupa o noveno lugar, onde País Vasco está á cabeza (2.951,6 euros), seguida de Madrid (2.865,9 euros). No outro extremo atópase Estremadura 2.043,8 euros.
Por hora efectiva, o dato galego é de 18,38 euros, após aumentar un 2,3% nos últimos 12 meses. A media estatal sitúase en 20,11 euros, logo de baixar un 0,4%.
Os outros custos subiron un 2,9% até 606,83 euros entre o terceiro trimestre de 2016 e o de 2017. Aquí, a media de comunidades elevouse un 0,7% até 645,15 euros. Por hora efectiva os outros custos son de 4,94 euros na Comunidade (+3,1%) e de 5,28 euros en España (-0,2%).
CUSTO SALARIAL
O custo salarial incrementouse un 1,7% en Galicia até 1.651,58 euros, máis que o avance do 0,3% da media española, que queda en 1.809,12 euros.
Por hora efectiva na Comunidade galega, o custo salarial situouse en 13,44 euros (+2%) e en España en 14,83 euros (-0,5%), con base nos datos do INE.
XORNADA LABORAL
A enquisa trimestral de custo laboral que publica este luns o INE tamén recolle información sobre xornada laboral, que en Galicia ten 152,5 horas pactadas por traballador e mes. As efectivas quedan en 122,9 horas e as non traballadas alcanzan as 30,3.
A tempo completo, as horas pactadas para os traballadores galegos supoñen 169 horas, pero as horas efectivas foron 135,3, mentres as horas non traballadas son 34,5.
Na xornada a tempo parcial, o pacto é de 87 horas e as horas efectivas son 73,5 horas, mentres as horas non traballadas están en 14,1.
Por outra banda, as vacantes foron 3.397 no terceiro trimestre do ano en Galicia, un 4,1% sobre o total. O 91,4% debeuse a non necesitar ningún traballador máis, o 6,1% polo elevado custo de contratación e un 2,5% a outros motivos.
DATOS ESTATAIS
Desta forma, a nivel estatal o custo laboral retorna de novo a terreo positivo e rexistra o seu maior repunte desde o cuarto trimestre de 2015, cando subiu un 1,2%.
O custo laboral componse do custo salarial e dos outros custos. No terceiro trimestre, o custo salarial (que comprende todas as remuneracións, tanto en metálico como en especie) incrementouse un 0,3% respecto ao mesmo trimestre de 2016, situándose nunha media de 1.809,12 euros por traballador e mes.
Os outros custos (custos non salariais) alcanzaron no terceiro trimestre deste ano os 645,15 euros, cun repunte interanual do 0,7%. O compoñente máis importante dos outros custos son as cotizacións obrigatorias á Seguridade Social, que totalizaron 595,45 euros, un 1,1% máis que no terceiro trimestre de 2016.
O segundo elemento importante dos outros custos son as percepcións non salariais, que caeron un 4,8% en taxa interanual, debido ao descenso das indemnizacións por despedimento e das outras percepcións non salariais. Pola súa banda, as subvencións e bonificacións, tamén incluídas nos outros custos, descenderon un 9,2% en taxa interanual.
A xornada media pactada no terceiro trimestre foi de 34,8 horas á semana. Destas, pérdense 6,9 horas á semana, das cales 5,4 son por vacacións e festas gozadas.
O custo laboral por hora efectiva retrocedeu un 0,4% no terceiro trimestre, situándose en 20,11 euros, como consecuencia do maior número de horas efectivas traballadas.
TODOS OS SECTORES ELEVAN O CUSTO LABORAL
Segundo o INE, todos os sectores elevaron o seu custo laboral no terceiro trimestre. O maior incremento, un 0,4%, correspondeu aos servizos, que situaron o seu custo laboral en 2.360,7 euros por traballador e mes. Seguíronlle a industria e a construción, con alzas interanuais, respectivamente, do 0,3% e do 0,1%, até os 2.943,56 e os 2.505,65 euros mensuais.
No caso do custo salarial, o único descenso anotouno a construción (-0,1%), mentres que os servizos elevárono un 0,3% e a industria, un 0,2%.
A HOSTALARÍA, ONDE MENOS SE COBRA
Por actividades económicas, a subministración de enerxía, gas vapor e aire acondicionado e as actividades financeiras son as que presentan os custos laborais máis elevados, con 5.127,37 e 4.532,42 euros por traballador e mes, respectivamente, mentres que os menores corresponden aos outros servizos (1.681,58 euros) e a hostalaría (1.614,25 euros).
Os crecementos interanuais máis significativos dos custos laborais no terceiro trimestre anotáronllos as industrias extractivas (+3,7%), o comercio (+2,9%) e a hostalaría (+2,5%). Por contra, as maiores caídas rexistráronse na subministración de enerxía (-2,1%) e as actividades sanitarias (-1,6%).
