cia" class="NormalTextoNoticia" itemprop="articleBody">
LUGO, 16 Abr. (EUROPA PRESS) -
A defensa de Félix Vidal Anido, coñecido como o violador do estilete, manifestou que non cree que resulte unha proba determinante" a análise da posición do teléfono móbil para situalo o día do intento de agresión a unha muller en Lugo, pola que foi detido e enviado de novo a prisión.
En declaracións a Europa Press, o avogado Marco Candal, que exerce a defensa de oficio de Vidal Anido, comentou que Lugo é "unha cidade pequena", polo que considera que os datos do repetidor non serán "relevantes" pola curta distancia que hai entre onde di o seu cliente que estaba--alega que colleu un autobús-- e o lugar onde foi asaltada a muller denunciante.
Neste sentido, sinalou que en canto a telefonía móbil en Lugo "todo está relativamente preto", polo que apunta a que probablemente opere o mesmo repetidor na zona da Estación de Autobuses e onde estaba a muller que denunciou os feitos, polo que reiterou que cre que os resultados da análise do móbil non resultarán "unha proba determinante".
Ademais, preguntado sobre se esta análise pode afectar ao recurso presentado contra a medida de prisión provisional, explicou que previsiblemente este será resolto antes de contar cos resultados da análise da posición do teléfono móbil do seu cliente.
Despois de saír do cárcere a finais do ano pasado a consecuencia da sentenza do Tribunal Europeo de Dereitos Humanos que derrogou a coñecida como doutrina Parot, o violador do estilete permanece en prisión provisional no centro penitenciario lucense de Bonxe tras ser detido o pasado venres por un intento de agresión acontecido o mércores anterior na cidade de Lugo.
Tras saír de prisión, Félix Vidal instalouse na parroquia de San Martiño de Barreiros, no municipio de Pol (Lugo), onde residen os seus pais, tras cumprir máis de 30 anos de prisión por medio centenar de ataques a mulleres.
