Foto: EUROPA PRESS
SANTIAGO DE COMPOSTELA, 8 Feb. (EUROPA PRESS) -
O avogado Xoán Antón Pérez-Lema, que representa o exdeputado do BNG Fernando Blanco, solicitou que se dite o sobresemento da causa en relación ao seu cliente, xa que "a única base para incriminalo son as manifestacións vexatorias e mentiras interesadas" do empresario Jorge Dorribo, principal imputado no 'caso Campeón', que investiga unha fraude para obter subvencións.
"Probablemente as fixo para saír de prisión", sinalou Pérez Lema en declaracións a Europa Press, nas que solicitou "un exercicio de responsabilidade" á instrutora do caso, a xuíza Estela San José, porque "ten que rematar o dano irreparable que se lle está a facer aos imputados" coa prórroga do segredo de sumario.
"A xuíza, como garante da legalidade e dos dereitos fundamentais debe finalizar este pesadelo e deixar sen efectos o segredo de sumario e debería ditar o sobresemento da causa", afirmou o letrado.
Na súa opinión, é "un tempo excesivo" a prórroga do segredo de sumario durante un mes máis, ata o 7 de marzo, que asinou a xuíza instrutora. Contra o novo prazo de cautelas xudiciais, tanto a defensa de Fernando Blanco como a de Pablo Cobián, o exdeputado do PP tamén acusado por Dorribo, recorreron por entender que vulnera o dereito de defensa.
"MENTIRAS"
Ao fío da información que este martes publica 'El País' en relación a que Dorribo enganaría a instrutora da 'Operación Campeón para que se acusase o exministro José Blanco de suborno Pérez-Lema sinalou que quedan acreditadas as "mentiras" de Jorge Dorribo e que "non hai base para manter a imputación" de Fernando Blanco, quen foi conselleiro co bipartito.
Por conseguinte, apelou a "non seguir vulnerando os dereitos fundamentais" de Fernando Blanco e a que, "o máis rápido posible", se levante o segredo de sumario, para logo, ditarse un auto de sobresemento da causa en relación ao seu cliente.
Ao respecto, recordou que un auto da Audiencia Provincial de Lugo do 27 de xaneiro avalou o segredo de sumario, pero solicitaba á titular do Xulgado de Instrución número 3 de Lugo que "á maior brevidade culmine as dilixencias indispensables" para poder levantar estas cautelas.