Delegados sindicais de Navantia encérranse na Xunta en Ferrol para reclamar a Feijóo que "dea a cara"

FERROL, 22 May. (EUROPA PRESS) -

Sobre un centenar de delegados sindicais do Comité de Empresa de Navantia Ferrol e Fene e de empresas auxiliares do naval realizaron un encerro no edificio administrativo da Xunta para reclamarlle ao presidente autonómico, Alberto Núñez Feijóo, que "dea a cara" e manteña unha reunión para explicalos os acordos alcanzados coa petroleira mexicana Pemex e que se anunciou que suporían a construción dun flotel en Navantia.

O encerro prolongouse dende as 12.00 horas ata case as 14.15 horas, na planta baixa de entrada ao edificio administrativo en Ferrol, sen que se producisen incidentes. Os traballadores pegaron nas paredes carteis nos que se lían frases como 'CulPPables', 'dique si' ou 'flotel xa', en referencia ás súas principais reclamacións.

Os delegados do comité fixeron entrega dun escrito por rexistro, dirixido á Xunta de Galicia, no que lle reiteraban a petición de reunión a Feijóo que xa formularon hai dez días sen que recibiran ningunha resposta.

Segundo os datos sindicais, ante a falta de nova carga de traballo en Navantia, nos últimos meses a cifra de despedidos en empresas auxiliares alcanza os 2.300 traballadores e a situación pode empeorar.

A maior parte das empresas están suxeitas a expedientes de regulación de emprego e o equipo principal de Navantia en Ferrol e Fene -uns 2.300 traballadores- finalizará este ano o último barco que queda en construción, o segundo ALHD para Australia.

Neste contexto, o voceiro do Comité de Navantia Ferrol, Ignacio Naveiras (CC.OO.), reiterou a petición de reunión á Xunta de Galicia para que "dea a cara" sobre esa promesa do flotel", posto que non hai resposta "máis de dez despois" de solicitada a reunión.

"A XUNTA ESCÓNDESE"

"A Xunta de Galicia escóndese totalmente máxime despois das noticias relativas a Pemex e Barreras", aseguraron Naveiras, que engadiu que as súas reclamacións se dirixen a "quen fixo a promesa política, e que xa non teñen nin a desvergonza de antes de vir a mentir para agora dar explicacións".

"Feijóo é o culpable desta situación, foi o que prometeu barco ou dique, e por desgracia non hai nin barco nin dique", engadiu Naveiras.

Os traballadores de Navantia xa aprobaron en asemblea apoiar a folga comarcal convocada de forma unánime por CIG, CC.OO., UGT e USTG en Ferrol o 12 de xuño para "esixir solucións". "A situación é clara, vai haber unha folga xeral en Ferrol, dada a situación económica, en gran parte vén da situación do naval e da redución económica que hai na bisbarra", manifestou.

O voceiro do comité, que acusou de "covardía" a Feijóo e ao conselleiro de Industria, Francisco Conde, por non dar respostas, censurou tamén a actitude do alcalde da localidade, o popular José Manuel Rey, por "poñer por diante os intereses partidistas".

NOVAS PROTESTAS

As protestas dos traballadores do sector naval de Ferrol repetiranse o 30 de maio, no que volverán estar presentes, como sucedeu o mes pasado, no pleno municipal da cidade. Volverán así a denunciar, ao seu xuízo, que as promesas de carga de traballo realizadas dende a Xunta e o Goberno son "un engano en toda regra, unha falsidade e un truco máis dos gobernos do PP".

A falta de carga de traballo abocou á maior parte das empresas a aprobar expedientes de regulación de emprego temporais ou extintivos. Víctor Ledo, representante da Federación de Industria de CC.OO., citou os exemplos de Clece ou Acciona, encargadas do mantemento, e de empresas de aceiros como Nervión, que de preto de 400 operarios pasou a ter en torno 50.

Outras compañías, como Eymosa, Calsomatu, Maessa ou Dinayn, están suxeitas a expedientes de regulación de emprego temporais, mentres que outras, como Tecnymo, optaron pola extinción de preto de 30 postos de emprego.

En cifras xerais, o número de operarios de empresas auxiliares que perderon o seu emprego sitúase, segundo CC.OO., en torno a "2.300".