Darío Campos avanza que antes do verán confía que se elaborara "un plan integral para o turismo na provincia de Lugo"
LUGO, 17 Ene. (EUROPA PRESS) -
O presidente da Deputación de Lugo, Darío Campos, acompañado de boa parte do goberno provincial presentou este martes a campaña coa que acudirán á Feira Internacional de Turismo (Fitur) en Madrid, 'baixo o lema 'Lugo cambia'.
Campos fixo especial fincapé en que o turismo é "unha prioridade" para a Deputación, véndoo como un "importante motor económico" nunha provincia con "moitos recursos". En Fitur, porase en marcha "unha campaña de promoción turística" no que deu en describir como "o mellor escaparate para facelo".
Campos quere contar "con todos os axentes no sector turístico" cos que se quere operar para esta "campaña de promoción turística de Lugo, para que esta provincia deixe de ser para moitos unha descoñecida".
"Hoxe presentamos a campaña que arranca este goberno da Deputación en Fitur porque cremos que é o mellor escaparate para facelo. É a feira turística de referencia no noso país, así como un encontro global para todos os profesionais do sector. Por iso a provincia de Lugo, no seu conxunto, tiña que estar na Feira Internacional do Turismo e vaino estar baixo este lema 'Lugo cambia'", concretou.
Campos relatou as "razóns" polas que se aprobou o eslógan, entre elas "a diversidade da oferta turística da nosa provincia, nada ten que ver a beleza das praias da Mariña cos viñedos da Ribeira Sacra".
"O que queremos transmitir á xente con este lema é que hai moitos mundos nesta provincia, que as experiencias que se viven son diferentes en función dos lugares que visites", subliñou.
Outra das razóns para o lema é que "fai referencia á evolución e innovación" da provincia e como en Lugo se se sabe adaptar "aos novos tempos, á historia e tamén á tradición". Finalmente, a terceira pata de "Lugo cambia" ten que ver "coas sensacións" de visitar a provincia.
"Cremos que a ninguén lle pode pasar desapercibida unha visita ás nosas praias rochosas, á nosa muralla que rodea a cidade de Lugo, as paisaxes das Reservas da Biosfera ou a entrada a Galicia a través do Camiño de Santiago polo Cebreiro. Lugo cámbiache", exaltou Darío Campos.
PLAN INTEGRAL PARA O TURISMO NA PROVINCIA
Baixo esta premisa de 'Lugo cambia' presentaranse en Madrid vídeos promocionais "sobre os diferentes mundos que conviven nesta provincia única e envexable".
Son traballos audiovisuais "sobre os cuatros destinos que hai en Lugo e que veñen determinados pola Xunta, que ten a competencia en turismo, e son A Mariña, que agrupa 15 concellos, Os Ancares e O Caurel, con 13, Lugo-Terra Chá, que aglutina 26 municipios ou a Ribeira Sacra, con outros 13 concellos".
Finalmente, Darío Campos avanzou que antes do verán confía que se elaborara "un plan integral para o turismo na provincia de Lugo", onde non se quere deixar a ninguén fóra, e co fin de conseguir un maior número de pernoctacións na provincia a base de paquetes para visitar distintas zonas.
