O ente provincial destina 650.000 euros a unha instalación á que chegarán exemplares duns 2.000 cazadores dunha ducia de cotos
LUGO, 16 Dic. (EUROPA PRESS) -
O primeiro centro público galego de despezamento de carne cinexética foi inaugurado este sábado na Fonsagrada, despois dun investimento da Deputación de Lugo de 650.000 euros.
Este centro prevé xerar beneficios anuais de 70.000 euros co despezamento semanal duns 65 animais e 1.820 exemplares transformados durante o sete meses existentes de caza.
Ademais, xerará catro empregos e contribuirá á promoción e venda de produtos autóctonos. Os fondos que obteña da compra de animais irán directamente a mellorar a actividade dos propios cazadores en actuacións no coto de rozas e aperturas de camiños.
A Deputación de Lugo financiou en solitario esta actuación con 300.000 euros para a construción do centro, situado nunha leira de 800 metros cadrados nun terreo cedido polo Concello da Fonsagrada na Rúa Rodas, e outros 352.000 euros para equipamento.
Ao acto de inauguración acudiron o presidente da Deputación de Lugo, Darío Campos; o alcalde da Fonsagrada e deputado de Cooperación cos Concellos, Argelio Fernández Queipo; así como membros do coto de cazadores.
"Con este proxecto conxunto de Deputación e Concello buscamos impulsar a economía da provincia, contribuíndo á promoción e venda de produtos cinexéticos", destacou Darío Campos.
FUNCIONAMENTO
Esta instalación está dirixida á comercialización de produtos de caza duns 2.000 profesionais da ducia de cotos da zona. Despois de capturar ao animal, o cazador diríxese ao centro para depositalo.
Alí rexístrase ao cazador que deixa o produto, así como o coto ao que pertence para que despois repercuta neste coto os beneficios. O proceso de despezamento dura un catro días, onde os veterinarios fan todas as probas sanitarias precisas para garantir o consumo destes produtos.
O inmoble, de máis de 500 metros cadrados, divídese en dúas plantas cos medios necesarios para o despezamento de carne e o seu posterior tratamento, onde conta con cámaras de conxelación de 25 metros cadrados.
