SANTIAGO DE COMPOSTELA, 13 Feb. (EUROPA PRESS) -
Axentes da Policía Autonómica do Grupo de apoio á Protección de Mulleres Vítimas de Violencia de Xénero de Santiago detiveron a un home por un suposto delito de violencia de xénero e por incumprimento dunha orde de afastamento.
Segundo informou a Vicepresidencia da Xunta nun comunicado, os axentes da Policía Autonómica recibiron un aviso do 112 sobre unha forte discusión entre unha parella e procederon a desprazarse até o domicilio.
Unha vez no lugar e, após comprobar que había indicios suficientes dun posible delito de violencia de xénero e que estaba en vigor unha orde de afastamento, procederon o domingo á detención do home e a súa posta a disposición xudicial.
As mesmas fontes da Xunta puntualizaron no seu comunicado de prensa que o home tentou darse á fuga cando detectou a presenza policial.
Actualmente a Policía Autonómica ten asignada a protección de 242 vítimas de violencia de xénero en Galicia.