VIGO, 23 Mar. (EUROPA PRESS) -
Axentes da Garda Civil detiveron, no sur da provincia de Pontevedra, a un home de 39 anos de idade, como suposto autor dun delito de abusos sexuais ao seu sobriño de 6 anos.
Segundo informaron fontes do Instituto Armado, a investigación iniciouse por mor da denuncia interposta pola nai do menor, cando o seu fillo lle confesou que estaba a ser obxecto de tocamentos obscenos por parte do seu tío político.
Este home era o encargado de recoller ao neno cando este visitaba á súa familia paterna (os seus pais están separados e trámite de divorcio) e as sospeitas comezaron hai algún tempo, xa que o menor trasladou á súa nai que "prefería que fose a súa tía quen lle recollese".
Estas sospeitas, ademais do relato pormenorizado que o neno fixo de, polo menos, dúas agresións sexuais sufridas en datas recentes, foron determinantes para que a muller puxese os feitos en coñecemento da Garda Civil.
As actuacións do Equipo Muller-Menor (EMUME) da Policía Xudicial da Garda Civil de Tui, co apoio do psicólogo da sección de Análise do Comportamento Delituoso, concluíron coa detención do tío do neno.
Após o arresto, os axentes realizaron un rexistro do domicilio e do coche do suposto autor dos abusos, e recolleron algúns efectos que foron remitidos aos peritos correspondentes para a súa análise e valoración.
O detido, pola súa banda, foi posto a disposición do xulgado de instrución número 2 de Ponteareas, que decretou a súa posta en liberdade, con medidas cautelares de prohibición de comunicarse ou achegarse tanto a este menor como aos seus propios fillos.
