OURENSE, 25 Oct. (EUROPA PRESS) -
Dous homes de 34 e 39 anos de idade foron detidos como presuntos autores de senllos roubos con forza en dous locais de hostalaría de Ourense, nos que nos que conseguiron acceder ás caixas fortes e subtraer máis de 38.000 euros, segundo informou a Policía Nacional da cidade.
En concreto, o primeiro dos feitos imputados aos agora detidos aconteceu na madrugada do día 27 do pasado mes de agosto, nun local de hostalaría da rúa Santo Domingo. Ambos os dous homes conseguiron entrar no establecemento forzando a porta de acceso e subtraer do interior dunha caixa forte 35.600 euros en efectivo.
Ademais do diñeiro, tamén levaron dous ordenadores portátiles, varios electrodomésticos, equipos de música e altofalantes, así como unha televisión de 50 polgadas, segundo indicou a Policía Nacional.
O segundo dos feitos aconteceu nunha cafetaría da praza Paz Novoa desta cidade na madrugada do 4 de setembro na que na que, a través dun burato na parede, os autores lograron acceder ao local e subtraer unha caixa forte que contiña no seu interior 3.000 euros. Tamén se levaron electrodomésticos e un portátil.
Unha vez coñecidos os roubos, a Policía Nacional iniciou unha investigación que deu como resultado coa detención dos dous homes, un deles veciño de Boborás e outro de Ourense. Cónstanlle dúas detencións anteriores a cada un.
