Tamén están citados como imputados un funcionario e dous administradores dunha construtora
VIGO, 20 Oct. (EUROPA PRESS) -
O concelleiro vigués do PSOE, Ángel Rivas, responsable das áreas de Limpeza, Parques e Xardíns, e Distritos, acudirá este luns a declarar aos xulgados de Vigo como imputado nun procedemento no que se investiga a comisión dos presuntos delitos de negociacións prohibidas para funcionarios e prevaricación administrativa.
A investigación xudicial, a cargo do xulgado de instrución número 1 da cidade olívica, iniciouse pola presentación dunha denuncia da Fiscalía. O ministerio público viu indicios de posibles irregularidades na contratación da subministración de formigón, por parte de adxudicatarias de obras municipais, á empresa da que Rivas era xerente.
Así mesmo, o ministerio público tamén pediu que se investiguen expedientes de adxudicación de obras e de recoñecementos extraxudiciais de crédito, xa que considera que a xunta de goberno recorría en exceso a este mecanismo.
Este luns están citados a declarar o concelleiro, así como o xefe de área da Concellaría de Fomento, Álvaro Crespo; e dous administradores da construtora Movexvial (agora Civisglobal), todos eles como imputados. En próximas datas citarase a declarar ás testemuñas.
EXPEDIENTES INVESTIGADOS
Así, centra o foco en cinco expedientes de recoñecementos extraxudiciais de crédito a favor da empresa Movexvial (cuxos administrador e apoderado tamén están imputados), aprobados en Xuntas de Goberno. Neses casos, aprobáronse indemnizacións a favor da construtora por un valor total que supera os 527.000 euros, no período abranguido entre o 17 de agosto e o 14 de decembro de 2012.
Ademais deses cinco expedientes, a Fiscalía pediu ao xulgado que reclame outros 14 expedientes de recoñecementos extraxudiciais de crédito (a inmensa maioría da área de Fomento, aínda que tamén de Patrimonio Histórico, Participación Cidadá, Emprego e Turismo e Comercio), e que se identifique o funcionario ou cargo que autorizou o gasto.
INOCENCIA
Tras coñecerse a imputación de Ángel Rivas, a única valoración feita dende o goberno foi a realizada polo propio concelleiro e polo voceiro do grupo socialista, Carlos López Font.
Primeiro nun comunicado, e horas despois nunha rolda de prensa na que non se aceptaron preguntas, Rivas proclamou a súa inocencia e subliñou que as acusacións contra el son "completamente falsas". O edil socialista defendeu a "legalidade e decencia" das súas actuacións.
Do mesmo modo, o voceiro do grupo municipal do PSOE e compañeiro de goberno de Rivas, Carlos López Font, sinalou que o goberno local confía na inocencia do concelleiro imputado e subliñou o seu "recto proceder" nas súas tarefas administrativas e políticas.
Malia a insistencia da oposición (máis morna no caso do PP), de IU e do chamado sector crítico do propio PSOE, o alcalde, Abel Caballero, non se pronunciou sobre a imputación de Rivas e manteno no cargo. Este luns, á mesma hora en que o concelleiro comparecerá ante a xuíz, o rexedor participará na reunión da Executiva Federal do PSOE en Madrid.
