SANTIAGO DE COMPOSTELA, 5 Oct. (EUROPA PRESS) -
O equipo médico de Pediatría do Complexo Hospitalario Universitario de Santiago (CHUS) accedeu a retirar a alimentación artificial a Andrea, a nena de 12 anos cunha enfermidade dexenerativa irreversible para a cal os seus pais piden unha morte digna, e será sedada en próximas horas, segundo informou o avogado da familia, Sergio Campos.
A nova postura do equipo de Pediatría do CHUS supón que só se lle vai manter "unha mínima hidratación" para que os fármacos fagan efecto, co que o desenlace será cuestión de días. "Poden ser dous, catro, oito ou 38 días", expuxo o avogado acerca da incerteza sobre o período que lle queda á pequena, pero puntualizou que Andrea terá unha morte "doce, un pouco máis doada que a vida que tivo".
O avogado da familia Lago-Ordóñez dixo descoñecer a razón exacta pola cal o equipo médico "rectifica a postura inicial", pero dixo "sospeitar" que está motivada pola mediación do maxistrado do Xulgado de Primeira Instancia número 6 de Santiago, Roberto Soto, quen a semana pasada adoptou varias medidas en relación a este caso, como solicitar o expediente clínico completo da menor e que esta fose sometida a un recoñecemento forense.
Este mesmo luns, o xuíz mantivo unha reunión cos pais da menor, no transcurso da cal se decataron de que o equipo médico accedía a "certa flexibilización" da súa postura inicial. "A cordura impúxose", afirmou Sergio Campos, quen agradeceu a xestión do xulgado.
O pasado 14 de setembro, o comité de ética asistencial recomendara no seu informe, precisamente, a retirada a Andrea da medida de soporte vital (NHA --nutrición e hidratación artificial-- por sonda PEG) e instaba a considerar a sedación paliativa.
Tras a negativa do equipo de Pediatría a acatar este procedemento, os pais de Andrea fixeron saltar o caso aos medios de comunicación o pasado mércores. Pero aínda que agora conseguiron o seu obxectivo, "están mal" porque se preparan para despedirse dun dos seus tres fillos, segundo indicou o avogado.
