Evacuadas catro persoas por un incendio nun piso en Santiago

SANTIAGO DE COMPOSTELA 23 May. (EUROPA PRESS) -

Catro persoas, dous varóns e dúas mulleres, foron evacuadas na noite do mércores a centros sanitarios ao resultar afectada por inhalación de fume debido a un incendio nun piso en Santiago de Compostela.

ÁS 21.17 horas do mércores un particular alertou dun incendio nun piso situado nun edificio de seis alturas no número 2 da rúa Alfredo Brañas de Santiago.

Foron mobilizados o 061, así como a Policía Nacional, Policía Local e os Bombeiros de Santiago, segundo os datos facilitados polo 112 a Europa Press.

Veciños que chamaron o servizo de emerxencias indicaron que había varias persoas pedindo axuda porque había moito fume e atopábanse mal.

Pasadas as 23.00 horas os bombeiros confirmaron que, por causas que se descoñecían, ardera o cuarto do segundo piso e a calor afectara a toda a vivenda. Ademais, apuntaron que polo fume se viron afectadas as escaleiras e outros pisos.

Ás 00.45 horas deste xoves o lume estaba apagado e o edificio fora ventilado. No marco do operativo foron evacuadas catro persoas que posteriormente recibiron asistencia por unha ambulancia do 061.

En concreto, o 061 trasladou a dúas mulleres de 28 e 30 anos ao Hospital Clínico de Santiago e a dous varóns de 23 e 26 anos a un centro de Atención Primaria, segundo sinalaron fontes sanitarias.