Foto: JGOGE/FLICKR
av2" class="NormalTextoNoticia" itemprop="articleBody">
Destacan que a tendencia de gasto, de número de receitas e de gasto medio por prescrición é "descendente"
SANTIAGO DE COMPOSTELA, 21 Ago. (EUROPA PRESS) -
A Federación de Farmacias de Galicia (Fefga) prognosticou este xoves unha "volta aos descensos" no número de receitas a partir do próximo setembro "da man da nova regulación dos prezos de referencia" dos medicamentos, tras a "baixada" que augurou "na contención do gasto" durante os meses de xullo e agosto.
Estas previsións baséanse nos datos do seu Observatorio do Medicamento, no que a Fefga constatou que tanto a tendencia de gasto, como a de número de receitas e de gasto medio por prescrición é "descendente".
Non obstante, ao ter en conta a "redución que supón" a parte pagada polos usuarios, "habería que considerar" que o gasto medio por receita "aumentará", argumentou a federación.
Nesta liña, acerca da "profundidade do descenso" do número de receitas, a Fefga opinou que influíu o descenso poboacional nalgunhas zonas e, "dende logo", o "efecto disuasorio" do copagamento, que --puntualizou-- tenderá "a normalizarse".
INCREMENTO EN XUÑO
Por outra banda, recordou que o número de receitas no mes de xuño se situou en 4,87 millóns, o que significa un incremento con respecto ao mesmo mes do ano anterior, cando a cantidade de receitas chegou aos 4,73 millóns.
En canto ao gasto medio por prescrición, a Fefga indicou que este se reduciu un 1,26 por cento en relación a xuño de 2013, mentres que o gasto total subiu de 54,87 a 55,77 millóns de euros, un aumento do 1,63 por cento.
"IMPACTO" NO MERCADO FARMACÉUTICO
Ao fío diso, a federación de farmacias galegas remarcou o "impacto" que causou no mercado a actualización do sistema de prezos de referencia dos medicamentos do Sistema Nacional de Saúde (SNS) publicado o pasado 15 de xullo, feito que a federación cualificou como o "máis importante dos últimos meses".
Nesta liña, manifestou que a nova orde de prezos "segue sendo motivo dunha importante controversia" entre os datos facilitados polo Ministerio de Sanidade e os calculados sobre o mercado por IMS Health, "os cales hai que considerar moito máis fiables", segundo defendeu a Fefga.
0,5% MENOS ENTRE XANEIRO E XUÑO
Ao atender ao número de receitas acumuladas entre xaneiro e xuño deste ano, as cifras reducíronse un 0,5 por cento; da mesma forma que o gasto medio por medicamento, que baixou un 1,1 por cento, e o gasto total, que descendeu un 1,6 por cento.
En comparación co primeiro semestre de 2013, a cantidade de prescricións aumentou un 6,49 por cento e o gasto medio por receita, tal e como mostra o estudio, baixou un 0,53 por cento. Mentres tanto, o gasto total en medicamentos ascendeu de 648,75 millóns de euros o ano anterior a 687,2 nos primeiros seis meses de 2014.
