SANTIAGO DE COMPOSTELA, 27 Ene. (EUROPA PRESS) -
O presidente da Xunta, Alberto Núñez Feijóo, avanzou este martes que a lei autonómica que prohibirá as doazóns de empresas aos partidos políticos se remitirá á Cámara ao longo do novo período de sesións, antes do mes de xuño.
De feito, ratificou que, como anunciara no último debate sobre política xeral, xa requiriu ao Consello Consultivo que redacte un anteproxecto de lei neste sentido e que espera recibilo "nos próximos días".
Na súa comparecencia no Parlamento para falar sobre impulso democrático, Feijóo recordou que sempre se mostrou partidario de modificar a normativa estatal para suprimir as doazóns aos partidos, de modo que comezou a actuar á vista de que estas poden ser aproveitadas para "o lucro persoal" ou "o financiamento irregular" das forzas políticas.
É unha das cinco leis que anunciou para loitar contra a corrupción e que se presentarán nos próximos 50 días. Súmase, así, a unha norma sobre transparencia na administración, unha regulación da asistencia xurídica a imputados, cambios na función do consello de contas e unha nova lexislación para a participación cidadá.
