Feijóo di que a Xunta "mantén o apoio" a Pescanova, pero que bancos e os administradores deben cumprir

SANTIAGO DE COMPOSTELA 23 May. (EUROPA PRESS) -

O presidente da Xunta, Alberto Núñez Feijóo, manifestou este xoves que o seu Goberno "mantén o apoio" a Pescanova co fin de garantir a viabilidade e os empregos, pero insistiu en que as entidades bancarias e os administradores concursais deben cumprir coas súas responsabilidades.

"A Xunta está a facer o que ten que facer, está a xestionar o diñeiro dos galegos. Os bancos están a xestionar o diñeiro dos seus clientes e os administradores o que teñen é que xestionar o día a día da compañía para garantir emprego e a súa viabilidade", sentenciou o presidente.

Na rolda de prensa posterior ao Consello da Xunta, tras publicar varios medios que o Goberno galego non estaría disposto a avalar á compañía que precisa 55 millóns de inmediato, replicou que a Xunta "segue e seguirá comprometida" con Pescanova no marco "dos intereses xerais".

"Mantemos o apoio e o compromiso de axudar á viabilidade da compañía, pero os bancos teñen que ser responsables en Pescanova, onde teñen intereses e os administradores teñen a obriga de sacar a compañía adiante", resumiu o xefe do Executivo.

Por outra parte, tras ser preguntado polas declaracións do presidente de Pescanova, Manuel Fernández de Sousa, e por se cre que as súas explicacións chegan tarde, escudouse en que non coñece a política de comunicación deste polo que non pode emitir unha valoración. "Supoño que fala cos medios cando se lle pregunta", dixo.

En calquera caso, subliñou que o que lle "interesa" da intervención de Sousa é que o seu obxectivo principal "segue sendo manter a viabilidade" da compañía e que "non se liquide". "Ese é un obxectivo que comparten os traballadores e a Xunta, que creo que comparten os administradores concursais e que espero que compartan as entidades financeiras", resolveu.