Feijóo pedirá ao PP unha reforma do Código Penal que endureza as penas contra os pirómanos

MADRID/SANTIAGO 2 Abr. (EUROPA PRESS) -

O presidente da Xunta de Galicia, Alberto Núñez Feijóo, anunciou que pedirá ao Comité Executivo Nacional do PP, que se reúne este luns en Madrid e está presidido por Mariano Rajoy, unha reforma do Código Penal que endureza as penas contra os pirómanos, a raíz do incendio no parque natural das Fragas do Eume.

"Pedireille ao meu partido que impulse unha reforma do Código Penal para dicir aos incendiarios que eses crimes contra o medio e tamén contra a vida das persoas non poden quedar simplemente nunha imputación e unha liberdade baixo fianza", explicou Feijóo en declaracións aos medios de comunicación antes da reunión do Comité Executivo.

Para o dirixente galego, con estes incendios quéimase o patrimonio nacional, polo que requiren unha "reflexión" para unha "modificación do Código Penal co agravamento das penas e facendo responsable aos incendiarios de toda a recuperación ambiental do monte".

Por iso, ve necesario que haxa non só unha "responsabilidade penal, senón tamén económica", algo do que se mostrou seguro de conseguir. É máis, manifestou que tras a reunión do Comité Executivo do PP manterá un encontro co ministro do Interior, Jorge Fernández Díaz, para "incidir na importancia da investigación destes incendios que están a asolar a cornixa cantábrica".

"BOAS NOTICIAS" SOBRE O INCENDIO

Sobre a evolución do incendio no parque natural das Fragas do Eume, o presidente da Xunta asegurou que "está sendo controlado" e que "a afectación é menor" da que o Goberno galego esperaba. "Boas noticias que esperamos confirmalas ao longo do día de hoxe", engadiu.

Ademais, indicou que na mañá deste luns mantivo unha reunión co ministro de Agricultura, Alimentación e Medio, Miguel Arias Cañete, na que "desbloquearon un convenio moi importante de máis de 150 millóns de euros para asegurar abastecementos e saneamentos neste tempo de seca continua".