"Agora tócalles aos cidadáns ver e interpretar o que pasou e intentar que haxa un goberno en España", asegura
SANTIAGO DE COMPOSTELA, 5 May. (EUROPA PRESS) -
O presidente da Xunta e líder do PPdeG, Alberto Núñez Feijóo, lamentou este xoves o "fracaso político" en España ao non lograr as forzas articular un Executivo para o país despois das eleccións xerais de decembro e manifestou o seu desexo de que "na segunda volta" do 26J saia das urnas "un goberno" e non confrontación.
Aínda que oficialmente quedan días para o arranque da campaña, Feijóo participou nun paseo cun marcado carácter preelectoral nunha mostra equina --o Concurso Cabalar Ascensión 2016-- aproveitando o festivo local da Ascensión na capital galega.
En declaracións aos medios, o propio Feijóo recoñeceu que "lamentablemente" o país está inmerso nunha "campaña electoral". "E digo lamentablemente porque esta foi a lexislatura máis curta que se coñece; creo que hai un antecedente alá por ano mil oitocentos e algo...", reflexionou.
Para Feijóo, esta situación constata o "fracaso político" que se produciu en España. "A ver se na segunda volta aclaramos e buscamos que haxa un goberno máis que a confrontación", manifestou, para engadir que dos comicios "teñen que saír gobernos e non confrontacions".
Non en van, esgrimiu que, se o que salgue das urnas é "o bloqueo do país", é que os comicios "non foron útiles".
QUE OS CIDADÁNS "INTERPRETEN"
Neste escenario, sinalou que "agora lles toca aos cidadáns ver e interpretar o que pasou e intentar que haxa un goberno en España".
"Para iso existe a democracia, para que se constitúan gobernos e para que o Parlamento teña en conta a decisión dos cidadáns", sinalou, para concluír que "o que deben facer os políticos" é "escoitar e entender a mensaxe dos cidadáns".
