Feijóo reitera que confía en que co primeiro pedido de Pemex se poida "empezar a cortar chapa en Navantia"

SANTIAGO DE COMPOSTELA 23 May. (EUROPA PRESS) -

O presidente da Xunta, Alberto Núñez Feijóo, reiterou este xoves que confía en que co primeiro pedido de Pemex "se poida empezar a cortar chapa en Navantia", pero insistiu en que, aínda así, é necesario traballo "adicional" e hai que activar "o departamento comercial" do estaleiro público para lograr máis carga de traballo.

Preguntado polas protestas na bisbarra e a folga convocada ante a difícil situación do sector naval ao termo do Consello, o presidente galego recordou que Navantia levaba "sete anos sen un encargo" e que iso xerou "unha enorme preocupación lóxica" aos traballadores e á industria auxiliar, que comparte a Xunta.

Dito isto, insistiu en que a competencia é da SEPI, ao tempo que sinalou que a Xunta traballa na medida das súas posibilidades e aludiu á alianza con Pemex, da que derivou o acordo para construír un flotel no estaleiro vigués de Navantia e outro en Ferrol.

A pesar de confiar que este "primeiro pedido" permita empezar a cortar chapa" nas bancadas de Navantia, agregou que esta debe "activar o seu departamento comercial" para conseguir pedidos posto que "unha empresa ten que vender" xa que as que non o fan "teñen problemas".

Como xa fixo en ocasións previas, o mandatario autonómico reafirmouse na necesidade de conseguir carga de traballo. "É certo que o anterior Goberno non logrou nin un pedido en sete anos, pero non se goberna a beneficio de inventario e cando se ten un problema hai que buscar unha solución", aseverou.

Por último, sinalou que se ben a Xunta non é a administración con competencias ao respecto, admitiu que si ten a responsabilidade afrontar os problemas derivados do "parón" do sector naval "derivados de moitos condicionantes" e, no caso concreto dos estaleiros privados de Vigo, tamén da "indecisión da UE co tax lease".