Feijóo ve "non comprensible" que o Goberno propoña un "labirinto sen aparente saída" ao recorrer a Lei de Caixas

SANTIAGO DE COMPOSTELA, 8 Feb. (EUROPA PRESS) -

O presidente da Xunta, Alberto Núñez Feijóo, advertiu hoxe de que "non sería comprensible" que o Goberno central sitúe a Galicia nun "campo de Agramante" que derive nun "labirinto sen aparente saída", en alusión ao recurso contra a Lei de Caixas galega anunciado polo Executivo estatal.

Durante a súa intervención na inauguración da xornada 'Situación actual e perspectivas das caixas de aforros', o presidente galego pediu "non converter" o proceso de fusión en Galicia, que xulga que será un "acerto histórico", nun "erro histórico". Así, reclamou que a solución se debe decidir "en Galicia" e avisou de que "non pasa por unha deslocalización financeira innecesaria, arbitraria e imposta".

Feijóo expuxo a traxectoria das entidades financeiras en Galicia como unha "historia de éxitos", na que a "guía" a constituíron "a serenidade, a rigorosidade e o apego territorial". "Galicia non quere desandar o camiño andado", proclamou e sinalou que os galegos desexan que o seu aforro sirva de "panca" ao desenvolvemento da comunidade e esperan unha solución para as súas caixas que cumpra os criterios mencionados e respecte "os dereitos constitucionais dos galegos e da comunidade autónoma".

"Galicia sería moi diferente se a singularidade cultural non se completase coa singularidade financeira", defendeu e afirmou que "ningún galego quere unha Galicia lesionada". O presidente da Xunta advertiu de que "se equivocan os que minimizan o sentido da responsabilidade e a intelixencia dos galegos" e chamou a "unir esforzos" para que a determinación que se adopte conte coa "participación de Galicia".

"GALICIA QUERE TER CAIXAS"

Así mesmo, lanzou a mensaxe de que o Goberno galego non foi escollido polos cidadáns para que se "inhiba" nos problemas e sostivo que a comunidade galega "non se caracteriza polo desarraigamento". A cuestión, dixo parafraseando a Shakespeare, converteuse en "ter ou non ter caixas". "E Galicia, xa llo anticipo, quere ter", resolveu.

Feijóo revelou que onte conversou de novo --tras o encontro do sábado-- coa vicepresidenta do Goberno central, María Teresa Fernández de la Vega. "Quero confiar na conversación mantida onte pola tarde con De la Vega. Seremos chamados de forma inmediata para facer o que tiñamos que facer antes de judicializar: dialogar", sinalou.

PUNTOS ADMITIDOS NOUTRAS COMUNIDADES

O presidente galego repasou algúns dos puntos da lei galega que o Goberno considera recurribles para expoñer os seus argumentos en favor da constitucionalidade da normativa galega. Así defendeu a adecuación dos puntos que se refiren á autorización expresa da participación dunha caixa galega nun sistema institucional de protección (SIP), a renovación dun 75 por cento dos membros dos órganos de goberno, o rexistro de altos cargos e a maioría esixida para aprobar unha fusión.

Ao fío diso, comparou o texto galego con leis doutras comunidades e, tras afirmar que Galicia non busca unha "política de confrontación", dixo non poder entender que se recorran puntos da norma galega "e se admitan noutras comunidades todos os preceptos" que se queren impugnar no caso galego.

Pola súa banda, a decana da Facultade de Ciencias Económicas e Empresariais de Santiago, Maite Cancelo, pediu superar "localismos e partidismos" no debate sobre o futuro das entidades de aforro e defendeu a Lei de Caixas de Galicia como "máis constitucional que outras que se aprobaron e non se recorreron".

Por último, o catedrático de Facenda Pública e presidente da Asociación Galega de Estudios de Economía do Sector Público, Luis Caramés, sinalou que o obxectivo de organizar esta xornada é "introducir racionalidade" no debate e alertou contra o "risco" de quedar sen caixas de aforro en Galicia.