Finaliza sen acordo unha nova reunión entre Urbaser e traballadores

Foto: EUROPA PRESS

A empresa maniféstase "decepcionada" e "desconcertada", mentres os representantes do equipo analizan o sucedido en asemblea

   SANTIAGO DE COMPOSTELA, 25 Jul. (EUROPA PRESS) -

   Unha nova reunión entre responsables da empresa Urbaser, concesionaria do servizo do lixo de Lugo, e os representantes dos traballadores para tratar de poñer fin á folga concluíu sen acordo tras unhas tres horas de negociación.

   No encontro, que comezou ás 11,00 horas deste venres e deuse por suspendida sobre as 14,00 horas, a dirección expuxo a súa proposta, que, segundo destaca o voceiro da compañía Benito García, "non era nada novo", pois xa fora trasladada ao mediador e "era coñecida".

   A devandita formulación consiste nunha suba salarial do IPC, a renovación do convenio por tres anos co recoñecemento de "tódolos dereitos" no ámbito social e laboral e deixar a problemática xerada polos expedientes e sancións a empregados para que se dirima en sede xudicial, segundo explicou García en declaracións a Europa Press.

   De acordo con este voceiro, os representantes do equipo, que se dan cita en asemblea dende as 18,00 horas deste venres, escoitaron esta oferta e, a continuación, expresaron as súas reivindicacións, que critican por ser "de máximos", ao seu parecer. "Válenlles nosas propostas pero, a maiores, piden o tema da paga dos 600 euros, a retirada de sancións e expedientes e a conversión de contratos indefinidos a tempo parcial en indefinidos a tempo completo", afirma.

   Esta última demanda refírese aos traballadores que fan un reforzo de servizo, e a súa modificación, a xuízo de Benito García, é "imposible" de aceptar para Urbaser, ao requirir un cambio do contrato que manteñen co Concello.

REUNIÓN CO CONCELLO

   Non obstante, os traballadores indicaron que intentarán manter unha reunión na Casa do concello o luns para abordar este tema, e a súa intención é volver negociar coa compañía a continuación. "Entendemos que é difícil, porque, ademais, a modificación contractual iría para lonxe, xa que require de informes, ir a pleno, ...", afirmou o voceiro. "Non sei se é o que eles queren", engadiu.

   Así as cousas, a empresa maniféstase "decepcionada" e desconcertada. "Estamos en varias semanas antes do inicio da folga, con estas reivindicacións de máximas," resume González.