av2" class="NormalTextoNoticia" itemprop="articleBody">
SANTIAGO DE COMPOSTELA, 30 Jul. (EUROPA PRESS) -
O tramo da autovía A-8 no que o pasado sábado se produciu unha colisión múltiple foi reaberto ao tráfico polo Ministerio de Fomento na mañá deste mércores, despois de permanecer pechada toda a noite tras a apertura inicial na tarde do martes, que se viu interrompida pola néboa.
Segundo informaron a Europa Press fontes de Fomento, en torno ás 11.00 horas deste mércores volveuse permitir o paso de vehículos no tramo da A-8 entre Abadín e Mondoñedo. A zona, que se abrira ao tráfico na noite deste martes tras rematar os labores de reparación de elementos da vía, foi cortado de novo pasadas as 23.00 horas pola presenza de forte néboa.
O pasado sábado, a causa da néboa, este tramo da autovía rexistrou unha colisión múltiple na que se viron implicados medio centenar de vehículos e no faleceu unha muller. Pechado dende ese día, a vía tan só se reabriu entre as 21,30 e as 23,00 horas do martes, pero a densa néboa obrigou a cortar de novo a vía. Ás 11.00 horas, a mellora da visibilidade permitiu de novo o tránsito de vehículos.
O departamento que dirixe Ana Pastor informou de que ao longo de próximos días se irán instalando diversas medidas de seguridade adicionais entre Mondoñedo e A Xesta como balizas de néboa e sinais de alta reflectancia.
Tamén se activarán paneis de mensaxes e estacións meteorolóxicas adicionais, que se sumarán ás medidas existentes, debido ás "condicións adversas, especialmente néboa e vento" da zona.
