Galiza Nova acusa a Política lingüística de desenvolver "un labor continuista" do PP no uso do galego

A CORUÑA, 5 May. (EUROPA PRESS) -

A organización xuvenil do BNG, Galiza Nova, acusou hoxe á Dirección Xeral de Política Lingüística de desenvolver "un labor continuista" respecto ao anterior goberno do PP, ao permanecer un uso "residual e minoritario" da lingua galega.

O voceiro de Galiza Nova, Daniel Carballada, sinalou que Política Lingüística depende da Consellería de Presidencia, o que significa "poñer o raposo a coidar das galiñas". "Jose Luis Méndez Romeu é o embaixador en Santiago do actual embaixador no Vaticano --o ex alcalde da Coruña Francisco Vázquez--, que estivo vinte anos no goberno máis galego-reaccionario que existiu e é coñecido o seu historial delituoso por perseguir aos nenos galego-falantes da bisbarra de Bergantiños", denunciou.

Así, acusou ao conselleiro de Presidencia da "inactividade real" de Política Lingüística "claramente continuista co PP" e que "relega ao galego á folclorización, á sectorialización, ao uso minoritario e residual, sen vontade de invadir espazos e alcanzar cotas ata agora negadas para a lingua".

Unha situación que, dende o seu punto de vista dáse tamén en concellos como o de Oleiros ou Cambre, ademais de no da Coruña. Nos casos de Oleiros e Cambre, Carballada denunciou que "cada vez se fan máis actos en castelán e hai unha ausencia de respecto da lingua e a cultura do país".

No caso do Concello da Coruña, puxo en valor o labor que desenvolve a Concellaría de Normalización Lingüística, pero criticou a actitude dos concelleiros socialistas e en especial do alcalde, Javier Losada. "Losada desenvolve unha actitude cínica que en determinadas ocasións mantén o respecto á cultura galega, e outras, para manter contenta a súa cuadrilla, mantén unha política 'españoleira', criticou.

ACTIVIDADES.

Ante esta conxuntura, Galiza Nova organizou unha campaña na provincia da Coruña para fomentar o uso do galego, en especial entre os mozos da conmemoración do Día das Letras Galegas.

A campaña, "revolucionaria e didáctica" tratará de "romper moldes e dar a coñecer os dereitos da poboación para falar en galego". Proxectaranse filmes como 'Eu nunca serei eu', ou 'Linguas cruzadas' nas localidades de Cambre, Culleredo e Betanzos, que contarán co comentario e a participación de Bieito Lobeira, Pilar García Negro ou a escritora Pilar Pallarés.

Ademais, realizarán un acto no campus da Universidade da Coruña tamén con Bieito Lobeira, e repartirán dípticos, adhesivos, carteis e 1.200 camisetas; mentres que organizarán un concerto en Arteixo para o que aínda non se fixou a data e acudirán o 18 de maio a Santiago á manifestación 'Polo dereito a vivirmos en galego'.