A defensa asegura que a última inspección foi o 25 de febreiro e que se o pagamento da PAC "chegase", a situación "non sería" a mesma
SANTIAGO DE COMPOSTELA, 29 Abr. (EUROPA PRESS) -
O gandeiro de Chantada na granxa do cal foron achadas 40 vacas mortas asegurou que as reses faleceron "en 15 días" debido a unha "bacteria" que estaba presente no silo vexetal do que se alimentaban, ao non poder facer fronte ao pagamento do penso polos seus "problemas económicos". Pola súa banda, a acusación popular pide que se lle condene por un delito de "maltrato animal" e outro "contra o medio e os recursos naturais".
Segundo confirmaron a Europa Press fontes xurídicas, o propietario da explotación chantadina, que está imputado por un delito de maltrato animal, acudiu este venres a declarar aos xulgados deste municipio lucense, onde respondeu durante máis de dúas horas ás preguntas da xuíza e acolleuse ao seu dereito de non responder ás formuladas pola acusación popular, que integran as organizacións Wings of heart, Santuario Gaia e Hogar Provegan.
Pola súa banda, o avogado do gandeiro, Fernando Lamela, explicou que "unha serie de factores" desembocaron na situación, que empezou por "problemas económicos" que tiveron a súa orixe "nunha partida mala de penso" en 2014.
Así, indicou que o seu defendido explicou ante a xuíza que "gastou os seus últimos euros" na compra de 18.000 quilos de palla en decembro de 2015", recurso que dispensaba pouco a pouco as vacas, ás que tamén proporcionaba "catro remolques de herba verde ao día" dado que "non podía facer fronte á compra de penso". Ademais, destacou que "tiñan auga corrente todos os días".
INSPECCIÓN O 25 DE FEBREIRO
"A pesar de ter un problema físico importante que faille estar en muletas dende o 2006 e ter que tomar morfina para soportar a dor mentres traballaba, levantábase todos os días ás 7,30 da mañá para atender ao gando, que era a súa ilusión e a súa vida como poden confirmar os veciños", explicou. "Non houbo ningunha morte dunha vaca dende agosto de 2015" e os servizos veterinarios estiveron na explotación o 25 de febreiro e "non detectaron ningunha anomalía", sinalou.
Con todo, apuntou que, "ao rematarse o silo vexetal" que lles proporcionaba ás reses, o día 15 de marzo "lle morreu a primeira vaca" e "ao día seguinte lle apareceron outras cinco mortas". "A partir de aí morrían como moscas e, as que sobreviviron, adelgazaban moito polas diarreas". "Consideramos que foi unha bacteria que había no silo, as vacas non morren así de súpeto", manifestou.
Ademais, tras insistir en que "non houbo ningún abandono" e que a "ilusión e a vida" do acusado eran as "súas vacas", coas que "traballaba dende que tiña 16 anos", lamentou que esta situación se unise "á falta de diñeiro" porque "non lle tiña chegado o segundo pagamento da PAC".
"Se este diñeiro chegase, a situación sería distinta", indicou antes de sinalar que cando o gandeiro viu as reses mortas intentou que o seguro se fixese cargo dos cadáveres pero "lle for a devolto o último recibo". "Ao non ter os pagamentos ao día, pedíanlle 60 céntimos por quilo para retirar as reses, un custo que, en total ascendía a uns 6.000 euros", precisou.
"Non tiña 6.000 euros, intentou reactivar o seguro, para que cubrise a retirada de cadáveres e, se tivera chegado a PAC un mes antes, estivese este problema totalmente solucionado, pero o señor non dispón dese diñeiro e por iso os cadáveres estaban aí", expresou.
En canto á sucidade que se atopou na corte, a defensa alegou que, "como chovera moito", o home "non puido sacar todo o zurro". "O día antes de vir a inspección sacou 15 cisternas de zurro e intentou limpar metendo tres de auga, pero as canles non se desatascaron", apuntou. "Todo iso o poden confirmar todos os veciños, el sempre se levantou ás sete da mañá todos o días do ano", insistiu.
POSICIÓN DA ACUSACIÓN
Fronte á postura da defensa, o avogado da acusación popular --formada por Wings of heart, Santuario Gaia e Hogar Provegan--, Víctor Valladares, considerou que existe un delito de maltrato animal e outro contra o medio e os recursos naturais.
Así, tras explicar que están á espera da decisión da xuíza, asegurou que pedirán a realización de máis probas para que se determinen todas as responsabilidades.
"QUE A XUNTA COMPAREZA"
Por outra banda, a Asociación Animalista Libera! pediu que a Xunta compareza como acusación popular no caso de Chantada ao considerar que é a Administración autonómica a que "debería esixir as máximas responsabilidades polo terrible estado no que se atopaban as vacas".
Así mesmo, reclamou que "debe existir un protocolo de actuación" ante os contextos de "maltrato animal" en explotacións gandeiras tras coñecerse, ademais do caso das vacas de Chantada, outros casos como o de Friol ou o de Boiro.
