O Goberno galego reservará por lei contratos para empresas que potencien a integración laboral de minusválidos

SANTIAGO DE COMPOSTELA, 22 May. (EUROPA PRESS) -

O Goberno galego reservará no proxecto de Lei de Racionalización da Administración Autonómica unha porcentaxe --aínda sen pechar, pero que podería ser de entre o 7 e o 10 por cento-- para que poidan optar a contratos públicos as empresas que potencian a integración laboral de persoas de minusvalidez como "un paso decisivo para alcanzar a integración plena na sociedade".

O vicepresidente da Xunta, Alfonso Rueda, realizou este anuncio tras reunirse co presidente da Confederación Galega de Persoas con Minusvalidez (Cogami), Anxo Queiruga, e de visitar con este as instalacións de Trameve, unha planta de tratamento ambiental e despece de vehículos, así como a sede de Galega de Economía Social.

Segundo explicou o vicepresidente, na norma que será aprobada proximamente no conselo e remitida ao Parlamento inclúese a posibilidade de que se reserve a participación de centros especiais de emprego e empresas de inserción laboral en determinados procedementos de adxudicación de contratos.

Ademais, ápoiase por lei a posibilidade de que se reserven parte dos contratos públicos a aquelas empresas nas que polo menos o 70 por cento dos traballadores sexan persoas con minusvalidez.

A esta medida hai que sumar outras novidades en materia de contratos como son as contratacións centralizadas para "aforrar custos", o fomento dos medios electrónicos e das solucións innovadoras ou a ponderación nas adxudicacións de criterios ambientais e sociais.

"DISCRIMINACIÓN POSITIVA"

Pola súa banda, o presidente de Cogami agradeceu o compromiso da Xunta ante a demanda do colectivo de que haxa "unha discriminación positiva" para as empresas de economía social e que se lles reserve "carga de traballo" posto que tamén a elas e aos seus traballadores, con problemas de minusvalidez, os afecta a crise económica.

Ao respecto, Rueda trasladou o apoio ao labor de Cogami e deste tipo de empresas, ao tempo que, preguntado pola porcentaxe de reserva de contratos, explicou que aínda non está pechado e, tras aludir a unha galla de entre o 7 e o 10 por cento, concluíu que o fixará o seu departamento mediante o diálogo co colectivo afectado.

O grupo de empresas que xestiona Galega de Economía Social conta con case 500 traballadores, dos que máis do 90 por cento son persoas con minusvalidez. A iniciativa repercute directamente na integración laboral destas persoas e redunda na súa integración plena na sociedade, segundo recoñeceu o vicepresidente.