A CORUÑA, 25 Nov. (EUROPA PRESS) -
O goberno local da Coruña negou a existencia de "incompatibilidades" no cargo da concelleira de Cultura, Ana Fernández, co de membro do consello de administración da empresa Minicentrales Bouza Vella S.L., segundo sinalaron a Europa Press fontes municipais.
Nun comunicado, o Grupo Municipal do BNG denunciou que a concelleira de Cultura, Ana Fernández, incorría en "incompatibilidade" no seu cargo "ao ser conselleira da empresa Minicentrales Bouza Vella S.L. e cobrar a dedicación exclusiva como edila do concello".
Por iso, o BNG pedía "explicacións" ao alcalde da Coruña, Carlos Negreira, xa que aseguraba que, segundo a documentación á que tiveron acceso, a concelleira "figura como parte do consello de administración desta sociedade, da que posúe o 16,6% do capital".
Non obstante, dende o goberno local argumentaron que, segundo a lei de Réxime Local, "non existe ningún tipo de incompatibilidade porque pertence ao consello dunha empresa que non está relacionada coa súa área", indicaron. Ademais, precisaron que "tampouco percibe retribución como vogal".
