Hugo e Noa, os nomes máis comúns entre os recén nacidos galegos

SANTIAGO DE COMPOSTELA 18 Jun. (EUROPA PRESS) -

Os nomes máis comúns entre os nacidos en Galicia durante o ano 2012 foron Hugo para os nenos e Noa no caso das nenas, segundo os datos feitos públicos este martes polo Instituto Nacional de Estatística.

Así, dos 10.999 nenos nacidos en Galicia durante o pasado ano, 421 chamáronse Hugo, o que converte a este nome no máis usado entre os recén nacidos da comunidade en 2012. A continuación na lista dos 10 nomes máis usados, os preferidos foron Mateo, Martín, Pablo, Daniel, Nicolás, Diego, Adrián, Alejandro e Manuel.

No caso das nenas, o favorito foi Noa, que levan 354 das 10.113 nenas nacidas en 2012 na Comunidade. A continuación, os pais decantáronse por Sara, Lucía, Daniela, Sofía, Carla, Alba, Paula, Martina e María.

Mentres que Hugo foi xa durante os últimos anos o nome preferido para os recén nacidos galegos, Noa alcanza por primeira vez en 2012 esta posición e desbanca o segundo posto a Sara, o nome máis posto para nenas en 2011 e 2010. En 2009 os pais decantábanse por Lucía.

No conxunto de España, o nome máis usado para os nacidos en 2012 foi Daniel, seguido de Hugo e Alejandro. Para nenas, o preferido foi Lucía, seguido de María e Paula.

En canto aos nomes máis comúns entre os habitantes de Galicia en xeral, os tradicionais seguen ocupando os primeiros postos. En todas as provincias galegas, o nome máis común é Manuel, seguido nalgúns casos por José e noutros por Antonio.

Na Coruña, Lugo e Pontevedra, o nome máis usado é María del Carmen, mentres que en Ourense é unicamente María. María, Carmen ou María del Carmen dispútanse en todas as provincias o segundo e terceiro posto entre os nomes máis comúns.