SANTIAGO DE COMPOSTELA, 30 Jun. (EUROPA PRESS) -
O incendio declarado o luns no concello ourensano de Boborás continúa activo e, con catro focos, en conxunto arrasou xa unhas 80 hectáreas de superficie.
Diso informou a Consellería de Medio Rural, que precisou que o lume se iniciou pouco antes das 16,00 horas do luns na parroquia de Xurenzás.
Na súa extinción levan traballado dous técnicos, oito axentes forestais, 12 brigadas, sete motobombas, unha pa, tres helicópteros e dous avións. Así mesmo, desprazáronse uns 60 efectivos da Unidade Militar de Emerxencias (UME) con seis motobombas e dúas nodriza.
SOBER, CONTROLADO
Por outra banda, a Xunta deu conta de que o lume de Sober (Lugo), que afectou a unhas 16 hectáreas --12 delas, de monte arboredo-- na parroquia de Anllo, quedou controlado poucos minutos antes da media noite. A 'situación dous', declarada pola proximidade das lapas ás casas, xa foi desactivada.
O incendio comezou pouco despois das 18,00 horas e no seu control traballaron un técnico, cinco axentes forestais, 11 brigadas, seis motobombas, unha pa e un avión.
TEO, EXTINGUIDO
Finalmente, en canto ao incendio de Teo (A Coruña), na parroquia de Calo, foi extinguido sobre as 3,30 horas da madrugada deste martes, tras arrasar 55 hectáreas de monte arborado dende as 17,40 horas.
Tras activar tamén a 'situación dous', na súa extinción traballaron catro axentes forestais, oito brigadas, oito motobombas, dous helicópteros e un avión.
