Lanzan un cóctel-molotov contra a casa sindical no Porriño (Pontevedra), pero sen causar feridos

   VIGO, 10 Mar. (EUROPA PRESS) -

   Un cóctel-molotov foi lanzado a pasada noite contra a casa sindical de O Porriño (Pontevedra), situada na rúa Antonio Palacios, e provocou diversos danos en varias ventás e a fachada do inmoble.

   Segundo explicaron a Europa Press os bombeiros de O Porriño, sobre as 2.20 horas recibiron o aviso de 112 --á súa vez, alertado por un particular-- sobre o acontecido, se ben cando chegaron ao lugar non había lapas. Non obstante, si puideron observar restos do artefacto incendiario, unha botella e a mecha, así como unha pedra.

   Ademais de constatar que o cóctel-molotov non entrara nas dependencias, os efectivos de extinción observaron que a fachada estaba manchada de feluxe, o cristal dunha ventá estaba roto e había outro estalado.

   Pola súa banda, fontes da Policía Local precisaron que, por agora, non se produciron detencións en relación a estes feitos, se ben a investigación a leva a Guardia Civil.

TERCEIRO ATAQUE

   Este ataque é similar ao acontecido a finais do pasado xaneiro no local de CC.OO. en Vigo, onde tamén houbo danos na fachada provocados polo lanzamento dunha pedra e un cóctel-molotov que non chegou a entrar nas dependencias.

   En declaracións a Europa Press, o secretario comarcal de CC.OO. en Vigo. José Cameselle, asegurou que este é o "terceiro ataque" que sofre o sindicato en algo máis dun mes: o cóctel-molotov de finais de xaneiro, unhas "pintadas" aparecidas no local de Vigo a semana pasada e agora os danos provocados no local de O Porriño, na parte das instalacións onde se sitúan os sindicatos UGT e CC.OO. --segundo explicou, as da CIG están noutra parte do inmoble -- .

   "Creo que ten relación con que CC.OO. non apoia a folga de hoxe", aseverou Cameselle. A CIG convocou para esta xornada un paro no sector naval, que non conta co respaldo de CC.OO. nin de UGT.