O portavoz parlamentario do PSdeG confía na transferencia da AP-9 a Galicia co novo Goberno pero ve difícil a supresión de peaxes
SANTIAGO DE COMPOSTELA, 17 Jun. (EUROPA PRESS) -
O portavoz parlamentario do PSdeG, Xoaquín Fernández Leiceaga, advertiu a Alberto Núñez Feijóo que "non se pode ser presidente da Xunta a tempo parcial", polo que no caso de que asumira liderar ao Partido Popular sostén que tería que renunciar á presidencia autonómica e "proceder con rapidez a un relevo".
Así o manifestou nunha entrevista en RNE, recollida por Europa Press, na que cuestionou as consecuencias de que se confirmasen os cada vez máis insistentes rumores que apuntan a que o actual presidente da Xunta podería optar a dirixir o PP nacional tras o Congreso que a formación celebrará en xullo.
Sen querer entrar a valorar o silencio que mantivo respecto diso Feijóo, Fernández Leiceaga si puntualizou que "debía aclarar se iso ten consecuencias para a gobernabilidade de Galicia e aclarar con precisión o calendario" para "proceder con rapidez a unha substitución", xa que considera que "non é compatible no tempo a presidencia do PP, que lle obriga a unha presenza na política española moi asidua, moi directa e constante, cun exercicio responsable na Xunta".
Leiceaga citou na súa argumentación posibles situacións concretas que avalarían esa incompatibilidade de cargos. "Falamos da AP-9, á mesma persoa que na Xunta pide a transferencia, despois o seu partido no Congreso, que depende del como presidente do PP en España, dille que non, é un exemplo claro de incompatibilidades, ou non pode ser que Feijóo defenda aquí criterios de financiamento autonómico e que despois vaia a Valencia a pedirlle apoio a militantes do PP e alí asuma outros", esgrimiu.
Pero máis aló de incompatibilidades políticas, estarían, puntualiza Leiceaga, as meramente "materiais". "Non se pode ser presidente da Xunta a tempo parcial, non se pode ser polas tardes ou de venres a domingo, e de luns a venres presidente do PP", insinuou.
En todo caso, Leiceaga intúe que as discrepancias de Feijóo coa postura do PP estatal en temas como a recepción dos inmigrantes do buque Aquarius responden a que o presidente autonómico "dáse conta de que está nunha situación nova e nesa ten que competir non só co PSOE senón tamén con Ciudadanos, e terá que modular a postura do PP".
TRANSFERENCIA DA AP-9
Por outra banda, Leiceaga tamén se situou sobre o debate ao redor da transferencia da AP-9 á Xunta, ante o novo escenario que se abre co cambio de goberno, e mostrou a súa confianza en que Executivo que lidera Pedro Sánchez "sexa sensible ás demandas de Galicia e convenza á maioría do Congreso" para lograla, aínda que lembrando que "o único grupo que segue mantendo unha postura contraria é o PP".
No entanto, matizou que ve máis complexa a eliminación de peaxes. "Queda unha concesión de 30 anos, que foi froito dun acordo do Goberno de Aznar coa Xunta de Fraga, e esa concesión hai que respectala, non se pode falar alegremente das peaxes", remarcou.
LOSADA "NON TEN POR QUE NON FACER UN BO DELEGADO DO GOBERNO"
Cuestionado sobre o nomeamento do ex alcalde da Coruña Javier Losada como Delegado do Goberno, Leiceaga limitouse a valorar que se trata "dunha persona que ten experiencia e cualificación suficiente para ser Delegado".
"Creo que o vai facer ben, non ten por que non facer un bo Delegado do Goberno que é o que todos esperamos", resolveu, sen pór en cuestión un nomeamento que, en cambio, non respondía inicialmente as preferencias da dirección socialista galega.
Leiceaga tamén defendeu a actuación do Goberno de Sánchez ante a polémica xerada pola condena a Máxim Huerta e a súa dimisión o mesmo día no que se coñecía a noticia.
"A reacción non foi só correcta senón tamén rápida. Hai que dar exemplo, a exemplaridade pública que se predica hai que practicala desde a oposición e o goberno, e neste caso o goberno de Sánchez resolveu unha crise en dez horas da mellor maneira posible", concluíu.
"O PP TEN UNHA ANSIEDADE EXCESIVA"
Tras a dimisión de Huerta o PP puxo en cuestión ao Ministro de Agricultura, Luís Planas, pola súa imputación nun suposto caso de uso ilegal de auga de Doñana.
Unhas críticas que Leiceaga atribúe a que "o PP está cunha ansiedade excesiva" e a que "non asimilou ben perder o poder", porque "non é que non lle conceda ao novo goberno os cen días de rigor, non lle concede nin horas nin minutos".
"O PP tiña que facer unha reflexión sobre as súas filas, non vou pedir a dimisión do alcalde de Sanxenxo que acaba de ser condenado nin que Ana Mato, condenada civilmente no Caso Gürtel segue sendo asesora do PP en Bruxelas", deslizou, recomendando aos 'populares' que esperen a poder xulgar ao Goberno polas súas accións.
En todo caso, explicou que, na súa opinión, no caso do Ministro de Agricultura, o código ético socialista é "moi claro" e suporía que en canto se abra xuízo oral será cando se establezan as responsabilidades derivadas. "Non estamos nese suposto, a impresión que teño é que é un asunto administrativo sen maiores consecuencias", finalizou.
