SANTIAGO DE COMPOSTELA, 14 Nov. (EUROPA PRESS) -
O voceiro parlamentario do PSdeG, Xoaquín Fernández Leiceaga, suxeriu este luns que o continuismo no goberno de Alberto Núñez Feijóo pode responder a que o presidente da Xunta tivera "dificultades para incorporar novos perfís".
Ademais, un día despois de que o mandatario revelase que repiten os 10 conselleiros que lle acompañaron na última fase do seu Executivo, o socialista, en declaracións aos medios tras reunirse con CC.OO., fixo fincapé en que non presentar "ningunha novidade" supón en si mesmo "unha declaración de intencións".
"Non hai ningunha reflexión autocrítica sobre o que se fixo ata agora", incidiu, non sen sinalar o "encaixe difícil" das declaracións do presidente sobre a apertura "dunha nova fase" co mantemento da mesma estrutura do goberno.
Tras subliñar que aprecia "certa dose de esgotamento" no proxecto que encabeza Feijóo Leiceaga lamentou que non se vexa "reflectido no goberno" que este mandato debe ter "un claro perfil social" e de aposta pola recuperación do emprego. "É certa decepción que non haxa esta translación", sentenciou.
