Aviso: Esta noticia tiene más de un año. Última actualización: 03/09/2010 19:38
O prezo do leite en orixe en Francia rexistrou un repunte do 6%, tras o acordo alcanzado no seo da interprofesional láctea por produtores, cooperativas e industrias, mentres que os gandeiros españois perciben pola venda do seu produto un 3,6% menos que a media europea, tras o novo descenso rexistrado en xuño.
Segundo informou o Ministerio de Medio Ambiente, Rural y Marino, os datos facilitados polo Eurostat reflicten unha "importante suba" de prezos en Europa no sexto mes do ano ata os 29,31 euros os 100 quilos, fronte ao descenso español.
Non obstante, o Ministerio apunta que a "anómala tendencia" decrecente dos prezos, parece inverterse, xa que o último dato dispoñible sitúa o prezo en España o mes de xullo en 28,35 euros os 100 quilos que supón unha moi lixeira variación á alza (+0,10 euros) respecto ao mes de xuño.
O departamento que dirixe Elena Espinosa considera que, analizando a conxuntura actual do mercado, "nada parece poder xustificar a escasa recuperación dos prezos", xa que ao ascenso dos produtos industriais se une "a boa situación de exportacións comunitarias de produtos lácteos e o mantemento en nivel de entregas".
Ademais, o Goberno fai fincapé no "significativo" feito de que, "malia todas as tendencias alcistas" nos mercados europeos e internacionais, nalgunhas zonas produtoras españolas os prezos para o mes de xullo "volveron rexistrar un descenso".