Letras Galegas.- Feijóo apela á "liberdade lingüística" e lamenta que Touriño "active a división e o conflito"

O presidente do PPdeG rendeu hoxe homenaxe a Álvarez Blázquez en Tui e recordou a súa "paixón por Galicia"

TUI (PONTEVEDRA), 16 (EUROPA PRESS)

O presidente do PPdeG, Alberto Núñez Feijóo, apelou hoxe ao compromiso coa lingua galega e á "liberdade lingüística", ao tempo que lamentou que o presidente da Xunta, Emilio Pérez Touriño, "utilice o seu cargo para activar a división e o conflito", cando se celebra o Días das Letras Galegas.

En declaracións aos medios tras participar nun acto de homenaxe a Xosé María Álvarez Blázquez, o líder dos populares galegos afirmou que, durante as celebración institucionais desta xornada "o PPdeG non vai facer nada que poida interpretarse como unha crítica a un adversario político" xa que o Días das Letras Galegas ha de servir para "reafirmar o compromiso pola lingua, a cultura e a liberdade lingüística".

Alberto Núñez Feijóo explicou que, durante o mando dos populares na Xunta, se aprobou unha lei de normalización lingüística e varios plans de fomento do galego, e lamentou que "outros non puideron manter o consenso que tanto custou conseguir durante 25 anos".

Así mesmo, criticou a Emilio Pérez Touriño por utilizar a presidencia e a institución do Goberno galego para "facer críticas". "Que o día que se celebran as Letras Galegas o presidente utilice as institucións para demonizar a un partido é algo que fala por si mesmo", apuntou.

Nese sentido, afirmou que o PPdeG "seguirá traballando polo consenso e a igualdade lingüística" e "non utilizará este día para dividir á sociedade", xa que "é un día para xuntar a todos os que cren que o galego é unha lingua extraordinaria en pé de igualdade co castelán". Ademais, recordou que, no contexto dunha España democrática, "as letras e a cultura galega atravesan a súa mellor etapa", xa que os galegos "se identifican como un pobo, sen autoexcluirse de ser españois, europeos e universais".

HOMENAXE A ÁLVAREZ BLÁZQUEZ

O presidente do PPdeG fixo estas manifestacións tras participar nun acto de homenaxe a Xosé María Álvarez Blázquez, que tivo lugar na biblioteca municipal de Tui (Pontevedra), vila natal deste autor, e no que estiveron presentes o alcalde desta localidade, os presidentes das Deputacións de Ourense e Pontevedra, o vicepresidente do Congreso, Ana Pastor, e outros deputados e cargos do PP.

Na súa intervención, que tivo lugar despois de que tres nenos recitasen varios poemas de Álvarez Blázquez, o presidente dos populares galegos eloxiou a figura deste poeta, novelista, editor, xornalista e investigador, e recordou o seu "compromiso e paixón por Galicia".

Feijóo recalcou que este autor, activo militante galleguista, "mantivo vivo o lume da lingua e a cultura galega" e que, grazas á democracia e a autonomía, "Galicia viu xerminar" o que este poeta e outros intelectuais da súa época "sementaron en tempos difíciles". "Superáronse os conflitos pasados para pensar nun futuro mellor", engadiu.