Letras Galegas.- A manifestación tratará de bater marcas de participación tras contar con case 400 apoios

SANTIAGO DE COMPOSTELA, 17 May. (EUROPA PRESS) -

Nun ano no que se discute se hai ou non conflito lingüístico en Galicia, A Mesa pola Normalización Lingüística convoca, como xa é tradicional, unha mobilización cívica para reclamar a plena normalización do galego nos diferentes ámbitos da vida. O presidente de A Mesa pola Normalización Lingüística, Carlos Callón, espera bater records de participación tras contar con case 400 apoios de entidades, asociacións, sindicatos, concellos e forzas políticas.

Nesta ocasión, baixo o lema 'Polo dereito a vivirmos en galego', a marcha centrará as súas reclamacións no ensino, a administración e nos medios de comunicación, porque son os eixes "básicos" para alcanzar a "normalidade" do idioma.

O presidente da asociación en defensa da lingua, Carlos Callón, invitou "máis que nunca" a toda a sociedade a participar na marcha de mañá, tanto aos galegofalantes coma aos que non o utilizan sempre ou nunca pero que "se solidarizan" co dereito a usalo.

Todos poderán "pintarse a lingua de azul" para impregnarse de galego e adquirir un compromiso en defensa do idioma, para o que se repartirán 10.000 piruletas desta cor, segundo adiantou Carlos Callón a Europa Press.

O presidente de A Mesa expresou que "non está nunha situación calquera" da súa historia, senón no seu "peor momento". Na súa opinión, atópase nun cruzamento de camiños e "dos galegos depende" o destino da lingua: "se queda relegado a un uso residual ou, pola contra, se normaliza".

MANIFESTO.

Deste modo, Callón fixou en tres os obxectivos da manifestación, que resumiu en "facer cumprir aos políticos as leis lingüísticas, esixir as garantías para vivir en galego en cada ámbito e reivindicar que o galego é a única lingua propia de Galicia, como recolle o Estatuto de Autonomía".

Concretamente, o manifesto 'Polo dereito a vivirmos en galego' recolle catro puntos fundamentais, de maneira que o primeiro deles considera o "dereito a vivir en galego como un dos dereitos humanos elementais que ten Galicia como pobo". Así mesmo, apunta que o galego "é o idioma natural de Galicia, tal e como recolle o Estatuto de Autonomía, é a lingua propia", polo que o pobo "ten dereito a que a súa lingua ocupe, con dignidade e normalidade, calquera ámbito da súa vida".

O segundo punto do manifesto postula que "deben existir garantías para poder vivir en galego, polo que esixe "compromisos e a aplicación e adopción de medidas legais por parte das Administracións públicas".

En terceiro lugar, A Mesa denuncia e alerta de que, "contra os que se apuntan á suposta defensa do bilingüismo, un bilingüismo dunha soa cara, pretenden unicamente o mantemento da diglosia e a desaparición do galego".

Por último, a asociación apela ao "compromiso persoal de todos" para "usar o galego en todos os ámbitos: coa familia, no traballo, nas relacións coa administración e en tempo de ocio". "O futuro do galego depende de nós", conclúe.

APOIOS.

A convocatoria está avalada por numerosos colectivos e axentes da Cultura e do activismo galeguista como Manuel Rivas, Avelino Pousa Antelo ou Isabel Martínez-Risco que mostraron xa publicamente o seu apoio á marcha e ao manifesto.

Manuel Rivas considerou a necesidade de encher as rúas para combater as antipatías polo galego, "disfrazadas baixo bilingüismo e liberdade", con "lexemas de simpatía" e "espazos de creatividade", sobre todo para lograr a normalización no "ensino e nos medios de comunicación".

No ámbito educativo, tamén se pronunciou CIG, da cal o seu secretario xeral, Anxo Louzao, acudirá á marcha. Aínda así, Louzao mostrou a súa "preocupación" pola situación actual e considerou necesario un "cambio radical" en xeral e, en particular, na educación.

"Se o sistema educativo non se normaliza" tampouco o fará a sociedade e criticou a aqueles que se manifestan en contra dun mínimo do 50 por cento de materias en galego. Deste modo, o sindicato nacionalista unirase á marcha do próximo domingo e acudirá coa súa pancarta 'Ensino en galego'.

Tamén o farán as xuventudes da formación frentista que apelan a todos os mozos a quitar o "medo" e "atreverse a falar en galego", 'Por que lle tes medo ao galego? Atrévete!'.