A presidenta da Cámara responderá polas "canles institucionais"
SANTIAGO DE COMPOSTELA, 9 Mar. (EUROPA PRESS) -
O deputado do BNG Bieito Lobeira dirixiuse ante a Presidencia do Parlamento para pedir "amparo" desta institución por recibir un "trato vexatorio, humillante e desprezativo" por parte do responsable dun control organizado pola Policía Nacional e por "un dos efectivos" deste corpo de seguridade. Na súa petición, agrega o número de identificación dos dous axentes.
Así, no documento, o parlamentario nacionalista afirma que "non só non se respectou o seu dereito a recibir atención en galego", o cal recolle o artigo 54.11 do Estatuto Básico do Empregado Público relativo aos principios de conduta que garantirán a atención ao cidadán na lingua que o solicite sempre que sexa oficial; senón que mesmo se lle "coaccionou por expresarse en galego". "Ademais de realizar comentarios absolutamente fora de lugar sobre os meus principios ideolóxicos-políticos", agrega.
"Os efectivos policiais chegaron a extremos de intimidación directa --unha vez identificado, tamén como deputado do Parlamento--, con cacheo e inspección do seu vehículo e das miñas pertenzas, coa presenza dun axente armado cunha metralladora, e apuntándome con arma a escasos centímetros da miña cara, ou co anuncio dunha denuncia negándome a notificar por qué motivo", relata na súa petición de amparo.
Así mesmo, indicou que as "ameazas foron constantes", dicíndolle: "Terás noticias nosas" e "Xa te decatarás cando recibas a denuncia", e "intolerables". "Non só por ser dirixidas a un deputado, senón a calquera cidadán que se atopase nunha situación similar", apostila.
"FEITOS GRAVES E INADMISIBLES"
"Os feitos expostos son de extrema gravidade e inadmisibles no que debera ser o comportamento normal das forzas e corpos de seguridade do Estado", considera o deputado do Bloque, quen baseándose niso pide o "amparo da presidenta" e, por iso, o inicio de "xestións tendentes a aclarar o sucedido e a correspondente depuración de responsabilidades".
Pola súa banda, fontes parlamentarias indicaron a Europa Press que a presidenta da Cámara, Pilar Rojo, responderá polas "canles institucionais" a petición formulada polo deputado nacionalista.
