SANTIAGO DE COMPOSTELA, 19 Mar. (EUROPA PRESS) -
O empresario galego José González, orixinario do Carballiño (Ourense), foi asasinado nun tiroteo ocorrido a última hora do sábado en Cidade de México.
Fontes da Xunta de Galicia confirmaron a Europa Press o falecemento do empresario, que residía en México, e puxeron todos os seus medios a disposición da familia, coa que están en permanente contacto á espera dos resultados da investigación sobre o suceso.
José González, de 72 anos, recibiu varios impactos de bala a última hora do sábado cando se atopaba próximo a un dos seus negocios na capital mexicana. Foi trasladado ao hospital, pero, finalmente, faleceu por mor das feridas.
O ataque tivo lugar na Delegación Miguel Hidalgo, cando o empresario se atopaba nun dos seus negocios. A falta de que avance a investigación, están abertas todas as hipóteses, incluída a do intento de roubo.
COÑECIDO NA EMIGRACIÓN
Propietario de varios negocios de hostalaría, hoteis e gasolineiras no país, o empresario era, ademais, cuñado do presidente do Centro Gallego de México.
José González era oriúndo do municipio ourensán do Carballiño e estaba casado cunha veciña de Beariz. Representantes de ambos os municipios expresaron a consternación tras recibir a noticia, dado que o empresario visitaba habitualmente a súa localidade natal e era moi coñecido na zona.
Tamén a área de emigración do PSdeG quixo mostrar, a través de Twitter, a "consternación" do partido pola morte de José González, trasladou o pésame á súa familia e transmitiu o seu apoio á comunidade galega residente en México e en toda Latinoamérica.