SANTIAGO DE COMPOSTELA, 18 Sep. (EUROPA PRESS) -
Un home de 48 anos faleceu durante a madrugada deste martes nun accidente de tráfico ocorrido no municipio lucense de Láncara.
Segundo a información do 112-Galicia, o suceso ocorreu pasadas as 4,30 horas no quilómetro 5,5 da estrada LU-622, no lugar de Armea de Abaixo, onde chocaron unha furgoneta de reparto e un camión de transporte de leite.
Na súa chamada aos servizos de emerxencias, o condutor do camión indicaba que a furgoneta se saltara un sinal de stop e chocara contra el, así como que o condutor do vehículo afectado estaba inconsciente e atrapado no interior.
Até a zona desprazáronse efectivos dos Bombeiros de Sarria, que liberaron á vítima, así como da Garda Civil de Tráfico. O 061 informou da mobilización dunha ambulancia asistencial con persoal sanitario do PAC de Láncara, que só puido certificar a morte do home.