Insiste no "nivel de risco moi baixo" de ter un caso en Galicia e subliña que a comunidade "está preparada" para responder
SANTIAGO DE COMPOSTE, 21 Oct. (EUROPA PRESS) -
A conselleira de Sanidade, Rocío Mosquera, expresou este martes a satisfacción pola recuperación da auxiliar de enfermaría Teresa Romero tras dar negativo o segundo test que confirma que superou a infección de ébola.
"Estamos moi satisfeitos do resultado, estabamos todos moi preocupados por Teresa e desexando precisamente esta boa noticia de que se recupere do ébola", manifestou Mosquera en declaracións aos medios antes de presentar profesionais a iniciativa sobre 'Estratificación por risco da poboación adulta en Galicia'.
"A nivel do Estado podemos confirmar que xa non hai ébola en España, co cal é unha dobre boa noticia", insistiu Mosquera, para engadir que "a situación se normaliza no Estado". "Porque o nivel de risco sempre dixemos que era moi baixo", engadiu.
Preguntada sobre o dispositivo establecido en España fronte ao ébola, a titular de Sanidade sinalou que "precisamente este resultado e que non haxa ningún outro caso positivo significa que funcionou ben". Ademais, recalcou que a "coordinación entre todas as organizacións funcionou ben".
MESES DE TRABALLO
"Nós levamos moitos meses traballando, dende que a OMS deu a alerta primeiro en marzo en África, e dende o 8 de agosto nos países occidentais, lévanse preparando para que a organización poida responder a unha sospeita", comentou. "Porque si pensamos que poida haber unha sospeita en Galicia, temos máis dúbidas de que poida haber un caso, porque seguimos dicindo que o nivel de risco en Galicia é moi baixo de ter un caso", puntualizou.
Así, volveu "tranquilizar a poboación" porque "en Galicia non hai ébola" e "os cidadáns galegos non contaxian o ébola porque non temos ningunha posibilidade de ter o virus circulando". "Se viñese un caso dun país africano descrito no protocolo estamos preparados para dar resposta, facer o diagnóstico e para ver a situación real se tivésemos un caso", sostivo para concluír que na comunidade o risco é "moi baixo de ter un caso".
