NCG Banco ingresa 308 millóns pola venda de participadas dende xaneiro de 2012

SANTIAGO DE COMPOSTELA, 19 Jun. (EUROPA PRESS) -

NCG Banco ingresou 308 millóns de euros pola venda de participacións empresariais dende xaneiro de 2012, dos que 140 millóns corresponden a operacións formalizadas entre xaneiro e xuño de 2013.

Nun comunicado, a entidade incidiu en que se atopa "por enriba" dos obxectivos marcados para a venda de participadas dentro do plan de reestruturación e recapitalización, que obriga ao banco a regresar ao negocio financeiro na súa área tradicional e desprenderse da carteira industrial.

A maior parte dos ingresos, 298 millóns, corresponde á venda de activos e paquetes accionariales en empresas e fondos de investimento, mentres que os 10 millóns restantes proceden de operacións de reorganización da carteira. En total, trátase de operacións que afectan a 24 empresas diferentes.

A entidade debulla as súas últimas operacións de desinvestimento, entre as que se atopa a venda do 5,19% que aínda conservaba en Sacyr tras desfacerse de paquetes de accións ao longo dos últimos meses. A venda, por 48,7 millóns de euros, fíxose no mercado e nun bloque de accións único. Deste modo, a súa participación pasou a cero e comunicou a súa saída do consello de administración da empresa construtora, na que tiña dous postos.

Ademais, tamén se pechou nas últimas semanas a venda do 25% que tiña na Luso Galaica de Traviesas, unha compañía con sede en O Carballiño (Ourense) dedicada á fabricación de travesas de formigón para ferrocarril. As accións foron adquiridas pola construtora Copasa, que xa tiña unha parte desta empresa.

Tamén se desprendeu do 5,05% de Elecnor, unha compañía española de enxeñaría, infraestruturas, enerxías renovables e novas tecnoloxías. A venda formalizouse con varios fondos de investimento tamén españois.

En canto ao grupo bodegueiro Vinum Terrae, que ten sede en Meaño (Pontevedra) e presenza nas denominacións Rías Baixas e Ribeira del Duero, a operación non foi un intercambio de accións, senón venda e arrendamento de varios activos, como maquinaria ou instalacións, ao grupo Freixenet.

Por último, a entidade indica que vendeu o 26,1% que controlaba en Artai, unha correduría de seguros para empresas, administracións, profesionais e particulares que ten as súas oficinas centrais en Vigo. Foi o propio equipo directivo o que adquiriu esta participación.

Entre as operacións figuran tamén a venda do 2,58% que NCG Banco tiña en T-Solar (sector da enerxía); o 0,98% de QMC Development Capital Fund (fondo de investimento); o 1,94% de Redes Enerxéticas Nacionais (enerxía); o 3,47% de Isdabe (sector hoteleiro); o 9,63% de GED Iberian Fund (fondo de investimento); o 26,8% de Cora Integral (inmobiliario); ou o 44,9% de Banco Etcheverría que adquiriu o banco venezolano Banesco.

A entidade sinala que estas vendas forman parte do seu plan de desinvestimento, para o que ten de prazo catro anos, e que pretende concentrar a actividade de NCG Banco na banca minorista para pequenas e medianas empresas (pymes) e familias, mantendo investimentos de capital unicamente en empresas ligadas directamente á actividade bancaria.