O número de falecidos en accidentes reduciuse un 57% en febreiro en Galicia, con 9 mortos fronte aos 21 de 2009

SANTIAGO DE COMPOSTELA, 2 Mar. (EUROPA PRESS) -

O número de vítimas mortais en accidentes de tráfico reduciuse nun 57 por cento o pasado mes de febreiro en Galicia, que rexistrou 9 falecidos noutros tantos sinistros, fronte aos 21 mortos en 20 incidentes na rede viaria galega en 2009.

A provincia da Coruña contabilizou o maior número de falecidos o mes pasado, cinco noutros tantos sinistros; seguida de Ourense, con dous mortos en dous accidentes; e Lugo e Pontevedra, un en cada caso, segundo o balance da Dirección Xeral de Tráfico (DGT) recollido por Europa Press.

A maior redución da sinestralidade viaria rexistrouse na provincia de Pontevedra, un 80 por cento menos, ao pasar de cinco vítimas en 2009; en Lugo reduciuse nun 75 por cento --de catro a un falecido--; e nun 50 por cento en A Coruña, --de dez a cinco mortos--, mentres que en Ourense se mantivo igual --dous-- .

En canto ás idades dos falecidos, dous eran menores de 25 anos; tres tiñan entre 25 e 35 anos; outros tres entre 46 e 65 anos; e un era maior de 65 anos.

DOUS MESES

Segundo os datos da DGT, no que vai de ano faleceron 22 persoas en 20 accidentes de tráfico, fronte aos 36 falecidos rexistrados en 33 sinistros no mesmo período de 2009.

A Coruña é a provincia con maior número de vítimas mortais en sinistros na rede viaria no que vai de ano, con 9 --fronte aos 15 de 2009-- ; seguida de Ourense e Pontevedra, con cinco; e Lugo con tres.