Un octoxenario resulta ferido moi grave en Vigo ao queimarse

VIGO 9 Feb. (EUROPA PRESS) -

Un octoxenario resultou ferido este xoves en Vigo ao sufrir diversas queimaduras a consecuencia de encher gasolina sobre unha cacharela que acendera para queimar uns restos de poda. O home permanece en estado moi grave.

Segundo informa a Policía Local a Europa Press, os feitos aconteceron sobre as 13.40 horas no Camiño Panasco --na zona de Ramón Nieto-- cando un home de 83 anos prendeu a cacharela e, posteriormente, botou gasolina, co obxectivo de avivar as lapas.

As mesmas fontes indican que se produciu unha "explosión" que provocou queimaduras ao ancián nunha perna, parte dun brazo e as costas, polo que tivo que ser trasladado ao Hospital Povisa.

Fontes hospitalarias explican a Europa Press que o paciente, de iniciais A.D.A., presenta queimaduras "moi profundas" no 40 por cento da superficie corporal e o seu prognóstico é moi grave. O home atópase ingresado na Unidade de Coidados Intensivos (UCI).

DANOS

Por outra banda, a Policía Local tamén informou este xoves dun incidente que provocou danos nun farol da iluminación pública e que aconteceu sobre as 13.00 horas na zona da nova rotonda que une as rúas García Barbón e Rosalía de Castro.

Nese lugar, unha grúa estaba a descargar entullos dende o tellado dun edificio cando un dos sacos de entullos golpeou unha pedra da fachada do inmoble, do tamaño aproximado dun "balón de baloncesto". Esta pedra caeu cara á rúa e provocou danos no farol, se ben non houbo que lamentar feridos.