A oficina principal de Novagalicia en Moaña reabrirá o martes pero seguirán as protestas de afectados por preferentes

VIGO 18 Jun. (EUROPA PRESS) -

A oficina principal de Novagalicia Banco na localidade pontevedresa de Moaña que tiña prevista a súa reapertura para este luns, e que finalmente non desenvolveu actividade de cara ao público pola concentración de afectados polas preferentes e subordinadas, volverá funcionar o martes, se ben os aforradores continuarán coas súas protestas.

Fontes dos afectados por preferentes explicaron a Europa Press que, tras manter este luns unha reunión con representantes da entidade, se decidiu que o martes a oficina "abrirá", pois o obxectivo é que os afectados "poidan recibir información" do proceso de troco que se abre a partir de agora. "Queremos que a xente reciba información, porque hai uns prazos e límites de tempo", aseguraron estas fontes.

En todo caso, os titulares de preferentes e subordinadas aseguran que manterán as súas protestas e, dende as 8.30 horas do martes, realizarán unha concentración ante a oficina principal. Así mesmo, explicaron que tamén realizasen concentracións nas outras dúas sucursais do municipio.

Segundo confirmaron a Europa Press voceiros da plataforma de afectados, a oficina amenceu "limpa" e sen os carteis que os afectados colocaran nos últimos seis meses nos que estiveron alí encerrados, pois ás 4.00 horas, por parte da entidade foron retirados os citados e tamén a "acampada" que mantiñan estes aforradores nos últimos meses.

Esta oficina bancaria --que ten un total de 9.000 clientes-- permanece pechada ao público dende o 3 de xaneiro, cando un grupo de afectados iniciou un encerro de protesta. A propia entidade financeira tomou esa decisión "ante a imposibilidade de garantir a prestación de servizos e a seguridade de clientes e empregados".