O operativo de reforzo nas oficinas de consumo asesorou sobre as preferentes a máis de 3.200 persoas en dous días

SANTIAGO DE COMPOSTELA 19 Jun. (EUROPA PRESS) -

O operativo especial activado polo Instituto Galego de Consumo para reforzar a atención aos afectados por unha mala comercialización de participacións preferentes e obrigas subordinadas de Novagalicia Banco atendeu máis de 3.200 persoas nos dous primeiros días dende a súa posta en marcha.

Dende este luns, as oficinas do instituto nas sete principais cidades galegas contan con 40 persoas que se centran "de xeito exclusivo" na axilización dos trámites da arbitraxe, na achega de información sobre as posibilidades da vía xudicial e na resolución de dúbidas sobre os procesos de troco e liquidez --compatibles coa arbitraxe e a vía xudicial--.

Na oficina de Pontevedra asesorouse a un total de 600 persoas durante as xornadas do luns e o martes, mentres na de Vigo foron 450, en A Coruña 414, en Santiago 365, en Ferrol 266, en Ourense 685 e en Lugo 475.

O operativo facilita información, en horario de mañá e tarde --de 9.00 a 14.00 e de 16.00 a 19.00 horas-- sobre as posibilidades da vía xudicial, que permitirá atender as reclamacións dos que foron vítimas dunha mala comercialización "e non se están a beneficiar da arbitraxe", segundo resalta a Consellería de Economía e Industria nunha nota de prensa.