SANTIAGO DE COMPOSTELA, 22 Dic. (EUROPA PRESS) -
Mergulladores de Salvamento Marítimo e da Garda Civil realizarán durante a xornada deste luns inmersións na zona do afundimento do 'Paquito Nº Dous' para tratar de localizar aos dous tripulantes que aínda permanecen desaparecidos.
Segundo informaron a Europa Press fontes de Salvamento Marítimo, para a xornada deste luns está previsto que realicen inmersións nas proximidades do pecio afundido os mergulladores de Salvamento Marítimo e os integrantes do Grupo Especial de Actividades Subacuáticas (GEAS) da Garda Civil. Desprazaranse ata a zona, fronte ás costas de Corrubedo, na Salvamar Sargadelos.
Paralelamente, e despois de que esta fin de semana fose localizado un xersei dun dos mariñeiros nunha praia, continuarán por terra os labores de busca a cargo de Protección Civil de Ribeira e de Boiro.
Salvamento recibiu ás 16,55 horas do martes o aviso dun particular de que non podía contactar co barco bateeiro 'Paquito Nº Dous', que saíra de Cabo de Cruz, en Boiro, onde ten o porto base, rumbo cara a Muros. O último contacto producírase ás 14,00 horas.
Na zona, localizáronse o martes diversos obxectos persoais dos mariñeiros desaparecidos, a botica de primeiros auxilios do bateeiro e unha mancha de gasóleo. O mércores foi recuperado ademais o cadáver do patrón, mentres que os outros dous tripulantes aínda permanecen desparecidos.
