O paro e a "deterioración" dos servizos públicos centrarán a actividade do PSdeG neste período de sesións

SANTIAGO DE COMPOSTELA, 3 Sep. (EUROPA PRESS) -

A "dramática" situación do mercado de traballo e a "deterioración" dos servizos públicos centrarán a actividade do Grupo Parlamentario Socialista durante o presente período de sesións, tal e como indicou hoxe o seu voceiro, Xaquín Fernández Leiceaga, quen admitiu que se ben non se trata de "cuestións orixinais", defendeu que "deben ter un reflexo" nos próximos presupostos da Xunta.

Sobre o primeiro dos asuntos, o dirixente socialista destacou, en rolda de prensa, o "alarmante crecemento" do desemprego a pesar de que Galicia rexistra "unha menor presión demográfica" que outras comunidades e unha importante caída da poboación activa. Dito isto, concluíu que a situación de "destrución de emprego" responde a que os mecanismos económicos "non están a funcionar", xa que dende a chegada de Alberto Núñez Feijóo á Xunta se perderon "75.000 postos de traballo".

En canto aos servizos públicos, Leiceaga recordou o informe presentado pola Federación de Asociacións para a Defensa da Sanidade Pública, segundo a cal Galicia se sitúa entre as tres comunidades con peores servizos sanitarios públicos. "Ponnos no pelotón de cola", lamentou, tras o cal reflexionou sobre que as autonomías que comparten con Galicia os últimos postos do ranking están lideradas polo PP --salvo Canarias, que goberna en coalición--. "Non é unha cuestión de presupostos, senón de ideoloxía", remachou.

Á situación da sanidade sumou a continuación a do sistema educativo público, respecto do que os socialistas, segundo subliñou, teñen "tódalas luces de alarma acendidas" ante a "deterioración" dun servizo que debe funcionar como "un ascensor social" e un "elemento de modernización".

Neste escenario, o voceiro dos socialistas galegos na Cámara autonómica incidiu en que "outros presupostos son posibles" e en que "hai marxe para reorientar o gasto" baixo "criterios de eficiencia" e introducindo modificacións fiscais que permitan actuar sobre os ingresos co fin de "blindar" a políticas de emprego e benestar como "máxima prioridade" da Xunta.

Convencido de que o Goberno galego non seguirá estas teses porque "está instalado na autocompracencia", avanzou o voto en contra do seu grupo aos presupostos do ano próximo. "Fan falta novas ideas ante unha situación cambiante que esixe modificar as prioridades para combater a crise", recalcou Leiceaga, quen evidenciou que os mandatarios da Xunta están "prematuramente envellecidos".

ASUNTOS "DE PAÍS"

Á marxe destes dous temas, o deputado do PSdeG tamén aludiu a outros asuntos "de país" sobre os que o seu grupo intentará chegar a acordos coas demais forzas. Concretamente, sinalou a reforma do Estatuto e a nova Lei da CRTVG, o relatorio da cal intentarán "activar".

Ademais, dada a súa condición de principal grupo da oposición, os socialistas centrarán o seu labor de control na aplicación do decreto que regula o uso do galego no ensino para "evitar que se lesionen dereitos" e na contratación de obra pública, dado que o conselleiro do ramo, Agustín Hernández, está actualmente imputado por falsidade documental.