A CORUÑA, 23 Feb. (EUROPA PRESS) -
O Pazo de Meirás figura á venda por un prezo de 8 millóns de euros na web da inmobiliaria cántabra Mikeli, especializada nun catálogo de propiedades de luxo, como palacetes e illas privadas. A aparición deste anuncio provocou que a Deputación da Coruña esixa á Xunta que inicie "de xeito inmediato" un expediente sancionador á familia do ditador Francisco Franco.
Na web de Mikeli figura que vende "en exclusiva" o Pazo de Meirás, propiedade que presenta baixo a designación de "inmoble singular en venda en Sada" e entre as fotos coas que se ilustra a propiedade figura tamén a capela e os xardíns. Tamén poden contemplarse senllos vídeos, un que presenta o estado actual da propiedade, subtitulado en inglés, e outro no que poden verse imaxes do ditador.
"A inclusión do Pazo de Meirás no catálogo de Mikeli Luxury Real supón un gran fito profesional para a empresa, pois trátase dun lugar emblemático e moi coñecido non só en España senón tamén fóra do noso país", afirma a inmobiliaria.
O anuncio transcende unha semana despois de que se filtrase a intención dos Franco de vender a residencia de veraneo do ditador, transcorridos menos de dous meses da morte de Carmen Franco Polo, a única filla do ditador.
RECLAMACIÓN Á XUNTA
Ante esta actuación dos Franco, a vicepresidenta da Deputación Provincial da Coruña, Goretti Sanmartín, urxiu a apertura dun expediente sancionador porque entende que a familia Franco deberían ter avisado á Xunta dous meses antes de que pretendía vender a propiedade, "para decidir se exercía ese dereito de tenteo ou non".
"Incumpriron ese prazo que se marca a lei. Entendemos que a Xunta ten que ter tolerancia absolutamente cero co intento de vender o pazo e exercer as accións pertinentes", afirmou Goretti Sanmartín, quen aposta por "tentar paralizar esta venda".
A representante nacionalista insistiu en que hai "moito nerviosismo e interese da familia Franco para tentar desfacerse dun ben do que se apropiaron de maneira ilícita" e que está protexido coa figura de Ben de Interese Cultural.
Na súa opinión, se a Xunta non abre "de maneira rápida" o expediente sancionador, "o que estará a haber é unha conivencia co Franquismo", porque cre que "se facilita que se poida producir esa venda".
Ao tratarse dun Ben de Interese Cultural (BIC), declarado no ano 2009, a Xunta ten dereito de tenteo, é dicir preferencia para adquirir a propiedade ao mesmo prezo que se acordou cun vendedor privado.
Goretti Sanmartín subliñou tamén que o próximo 1 de marzo a Deputación da Coruña fará públicos o informe histórico e o xurídico que abre "vías legais para que o pazo pase a ser un ben público".
