Ambas as partes seguen enrocadas nunha reunión a tres bandas e encontros diferenciados para abordar o plan de reordenación das liñas
SANTIAGO DE COMPOSTELA, 28 (EUROPA PRESS)
Piquetes da folga de autobuses realizaron este mércores varias ocupacións simbólicas das dependencias da Dirección Xeral de Mobilidade en Santiago, A Coruña e Pontevedra, o que provocou o primeiro contacto entre os sindicatos e a Xunta desde que arrincou a folga.
Con todo, ambas as partes seguen enrocadas na solicitude dunha reunión a tres bandas e o ofrecemento de encontros diferenciados para abordar o plan de reordenación das liñas do transporte de viaxeiros por estrada na comunidade.
En concreto, foron o titular de Mobilidade, Ignacio Maestro, e o secretario xeral técnico da consellería, Joaquín Macho, os que se reuniron con representantes de UGT, CC.OO. e CIG nas oficinas da dirección xeral en Compostela, en Área Central, en Fontiñas.
Segundo fontes de Infraestruturas consultadas por Europa Press, este encontro demostra a "disposición ao diálogo" do Goberno galego, ao que centrais e patronal esixen unha reunión a tres banda para abordar o novo plan de reordenación das liñas cuxa primeira fase prevé a súa implantación para o próximo agosto.
"ENDURECEMENTO"
Pola súa banda, os representantes dos traballadores destacan que os actos "simbólicos" de ocupación pretenderon trasladar á administración a mensaxe de que lles terán que ver, "aínda que non queiran".
O portavoz da CIG Inácio Pavón sinalou que na cita co director xeral e o secretario xeral técnico os sindicatos trasladaron unha vez máis a súa esixencia dunha mesa tripartita, nun contexto de protestas "máis contundentes" que precede a un posible "endurecemento" das mobilizacións.
A extensión dos paros a todos os días --están convocados para martes e mércores de maneira indefinida-- é unha das opcións que está "sobre a mesa", segundo explicou Pavón.
Pola súa banda, o departamento que dirixe Ethel Vázquez insiste en que para falar de emprego e da subrogación dos postos de traballo "hai que falar por separado", e reitera que o que expón a patronal --unha prórroga das concesións ás que renunciaron a partir de agosto-- "non é viable".
