SANTIAGO DE COMPOSTELA, 29 Jun. (EUROPA PRESS) -
O deputado do PPdeG José Manuel Balseiro anunciou este mércores o seu apoio a unha iniciativa parlamentaria do BNG que, co respaldo de toda a oposición, esixe á Xunta que poña en marcha "tódalas accións necesarias encamiñadas a garantir os centros produtivos e os postos de traballo de Alcoa" en Galicia.
Esta proposición non de lei foi defendida pola nacionalista Carme Adán, quen recordou que o problema desta empresa é "o custo da enerxía", que supón en torno ao 45 por cento dos seus custos.
Polo tanto, ante o pleno da Cámara, solicitou que a Xunta asuma "ser socio investidor" de Alcoa e, ademais, urxir ao Goberno central para que celebre a próxima poxa eléctrica. En paralelo, ao seu xuízo, as súas reclamacións ao Executivo estatal deberían incluír a redución das peaxes eléctricas para a industria, ao igual que acontece en Euskadi.
Con todo, estas peticións --que parten do comité de empresa-- non forman parte do texto da iniciativa parlamentaria, que, de forma máis xenérica, unicamente pide á Xunta que tome medidas. Se ben se someterá a votación ao longo da tarde, o PP xa avanzou o seu apoio.
VISIÓN DA OPOSICIÓN
En canto á oposición, tanto o PSdeG como AGE e o Grupo Mixto expresaron o seu respaldo a esta medida, á vista da importancia de Alcoa para o PIB galego e de que son 1.500 os empregos desta factoría, que se suman a preto de 600 indirectos.
"Os traballadores están vivindo con bastante incerteza todo este proceso", referiu o socialista José Ramón Val, para quen o Goberno debe escoitar as formulacións do comité de empresa.
Pola súa parte, dende Alternativa, Ramón Vázquez agregou que debe convocar canto antes a poxa eléctrica, xa que tampouco tivo "empacho" para prorrogar a concesión de Ence estando en funcións. Adicionalmente, Consolo Martínez (Mixto) esixiu á Xunta que "pense máis" no interese de Galicia que "en Madrid" e defenda os empregos de Alcoa.
"TEN FUTURO"
Dende as filas do PPdeG, José Manuel Balseiro relacionou o seu voto favorable a esta proposta coa "responsabilidade" da súa formación e co feito de que "este proxecto industrial", o de Alcoa, "ten futuro".
"Este partido cre nese futuro; pero vostedes non cren nada", recriminou en dirección ás bancadas da oposición, antes de evidenciar a contradición que, dende a súa óptica, supón "por un lado apoiar a Alcoa e por outro querer pechar Ence".
