SANTIAGO DE COMPOSTELA, 23 Abr. (EUROPA PRESS) -
O PPdeG aprobou en solitario unha proposición non de lei que reclama promover os bancos de libros de texto, compatibles coas axudas "a quen máis o necesite", e impulsar ao mesmo tempo a dispoñibilidade de materiais e contidos dixitais. Todos os grupos da oposición rexeitaron a iniciativa e pediron recuperar un sistema de empréstito universal.
O autor da proposta, o deputado do PPdeG Román Rodríguez, defendeu como satisfactorios os resultados do sistema de gratuidade solidaria de libros de texto e sinalou que na sociedade actual "o mundo dixital está cada vez máis presente". O uso deste tipo de materiais, destacou, "reduce a exclusión social" porque o acceso resulta máis barato.
En fronte, todos os grupos criticaron o actual sistema de gratuidade de libros e defenderon un modelo de empréstito. En concreto, o voceiro do PSdeG no debate, Vicente Docasar, acusou os populares de inclinarse pola "beneficencia".
"Non se defende as familias facéndolles pagar cada ano os libros de texto", protestou e reclamou un sistema de empréstito porque é "socialmente máis xusto" e "economicamente máis eficiente". Ademais, pediu chegar ao 100% do alumnado das etapas obrigatorias".
O representante de Alternativa Galega de Esquerda (AGE), Ramón Vázquez, considerou que a iniciativa é "na práctica unha emenda á totalidade á política do PP" e criticou que o Goberno galego vaia gastar case 8 millóns" nun ámbito dixital que se pode conseguir de forma gratuíta".
Pola súa banda, o deputado do BNG Cosme Pombo reivindicou que a educación "é un dereito fundamental que debe ser gratuíto", pero a iniciativa do PP "vai por outro camiño", polo que trasladou o seu rexeitamento.
Por último, a deputada do Grupo Mixto, Carmen Iglesias, defendeu como "imprescindible" a gratuidade dos libros de texto e sostivo que "o programa de empréstito universal pretendía iso". A gratuidad solidaria "é unha axuda parcial e restritiva", criticou.
