SANTIAGO DE COMPOSTELA, 19 Sep. (EUROPA PRESS) -
O secretario xeral do PPdeG, Alfonso Rueda, asegurou que a formación mantén a súa defensa "con énfase e convicción" da reforma electoral para que goberne a lista máis votada e non a dá por "aparcada", malia a decisión do PP estatal de retirar esta proxecto do debate co PSOE para a "rexeneración democrática".
En declaracións aos medios, tras manter un encontro na sede autonómica co novo voceiro, Miguel Tellado, o número dous do PP galego subliñou que o seu partido seguirá defendendo "con énfase" que goberne a lista máis votada, toda vez que non a dan por retirada.
"O que se dixo é que se ía discutir noutro ámbito e noutro ámbito se está a discutir", remarcou, para engadir que o PPdeG presentou mocións nos concellos para demandar esta reforma e continuará na mesma liña, toda vez que considera que é "unha medida xusta" que incide de forma favorable "na democracia".
"Defendemos unha cousa con convicción porque cremos que é xusta e non imos deixar de defendela; non a damos por aparcada nin moito menos", insistiu Rueda, quen, preguntado pola dificultade derivada dos tempos lexislativos de que poida estar para as municipais de 2015, replicou que aínda se está "en prazo".
Dito isto, defendeu a postura do PPdeG e sinalou que "non tería moito sentido" reivindicar a reforma "hai dúas semanas e deixar de facelo repentinamente. Así, resaltou que o PP galego defenderá "ata o final" que goberne a lista máis votada, aínda que recordou que a decisión definitiva non depende do PPdeG.
'MAREAS' CIDADÁS
Por outra banda, preguntado acerca de se ao PPdeG lle preocupan as 'mareas' cidadás, respondeu que o que "preocupa" ao partido que lidera Alberto Núñez Feijóo é "seguir mantendo unha comunicación" co seu electorado.
Dito isto, aludiu aos resultados das últimas eleccións europeas antes de admitir que "hai cousas que mellorar", ao tempo que engadiu que niso "está" o PPdeG. "Cada un fará o que estime conveniente, nós sabemos o que temos que mellorar e niso estamos", resolveu.
