SANTIAGO DE COMPOSTELA, 23 Sep. (EUROPA PRESS) -
O Grupo Popular presentou unha proposición non de lei na que solicita que, na próxima reunión da comisión mixta para a xestión da Autoestrada do Atlántico (AP-9) entre a Xunta e o Ministerio de Fomento, se estude a supresión da peaxe de Rande en Redondela "en condicións equiparables ao establecido para o tramo entre Vigo e O Morrazo".
O deputado do PPdeG Alberto Pazos subliñou tamén que o PPdeG demanda ao Ministerio e á concesionaria Audasa o acompasamento da apertura do novo carril nesta autoestrada ao seu paso polo Colexio da Igrexa en Redondela co traslado do alumnado ao novo colexio a construír na Finca da Ginaria.
A proposición non de lei do Grupo Popular incorpora, ademais, demandar ao Ministerio de Fomento que analice a viabilidade da apertura da saída coñecida como Torres de Padín, en Chapela, así como a urbanización da Avenida de Redondela na N-552.
Así mesmo, demándase á concesionaria Audasa o tratamento como urbano do tramo da AP-9 que transcorre por Chapela, establecendo os correspondentes protocolos de iluminación e mantemento.
Outra das cuestións que se solicita a Fomento e Audasa é que, no marco das obras de ampliación da AP-9, instálense pantallas anti ruído nos puntos nos que sexa necesario de acordo coa mnormativa vixente, adoptando as medidas paliativas que minimicen o impacto da autoestrada e melloren a compatibilidade desta infraestrutura coa contorna construída e co día a día dos veciños.
CONTRAPRESTACIÓNS PARA CHAPELA
Nun comunicado, Pazos subliñou que a parroquia de Chapela, en Redondela, sofre "desde hai moito tempo" os inconvenientes derivados da súa situación xeográfica, pola que se viu afectada "por un número importante de infraestruturas de comunicación".
"Chapela nunca resultou beneficiaria das xustas contraprestacións que deberían corresponder aos seus veciños, en atención á súa contribución ao desenvolvemento de toda a comarca", esgrimiu.
En concreto, aludiu ao acordo alcanzado en 2006 entre o anterior presidente da Xunta, o socialista Emilio Pérez Touriño, e a entón ministra de Fomento Magdalena Álvarez para a supresión do pago de peaxe para os usuarios da AP-9 entre O Morrazo e Vigo, nunhas condicións que "supuñan unha inxustificada agresión á comarca de Redondela".
Ao seu xuízo, a situación "agravouse" en 2011, cando o entón ministro socialista de Fomento José Blanco acordou as obras de ampliación da Ponte de Rande e da AP-9 ao seu paso por Chapela "sen incluír ningunha medida paliativa".
Por iso, Pazos considera que esta "xenerosidade mostrada polos veciños" debe verse recompensada con medidas paliativas como as que reivindica a iniciativa.
